ԱՄՆ նախագահի նախկին թեկնածու Միթ Ռոմնին FOX News-ին տված հարցազրույցի ժամանակ հայտարարել է, որ երբեք Ռուսաստանին իրավունք չէր տա այս տարի անցկացնել ձմեռային Օլիմպիադան՝ կապված երկրի քաղաքական դիրքորոշման հետ:
«Եթե ինձ իրավունք տային որոշել, ես չէի քվեարկի Ռուսաստանի օգտին՝ որպես ձմեռային կամ ամառային Օլիմպիադայի անցկացման վայր: Սակայն դա իմ որոշելիքը չէ: Ռուսաստանը խոշոր խաղացող է միջազգային հարթակում: Նա իրավունք ունի հայց ներկայացնել: Այնուամենայնիվ, դա հակասում է այնպիսի մարդկանց համոզմունքներին, ինչպիսին ես եմ, հաշվի առնելով այն հանգամանքը, թե ինչպես է պահում իրեն այդ երկրի ղեկավարությունը, և ինչպես է դա արտացոլում օլիմպիական ոգին»,- ասել է Ռոմնին:
Ռոմնիի կարծիքով՝ Ռուսաստանի իշխանությունների վարքը հակասում է Օլիմպիադայի ոգուն: Նա հիշեցրել է 1936թ. Բեռլինի Օլիմպիադան, որն անցկացվել է Ադոլֆ Հիտլերի օրոք:
«Հիտլերի ներկայությունն այնտեղ, անխոս, հակասել է օլիմպիական ոգուն: Եվ, բնականաբար, նման բան կարող է տեղի ունենալ մեր ժամանակներում՝ տեսականորեն կամ հստակ դեպքում»,- հայտարարել է Ռոմնին:
Նա նաև նշել է, որ Ռուսաստանը համագործակցության հատուկ պատրաստակամություն չի դրսևորում համաշխարհային բեմահարթակում:
«Վերջիվերջո՝ Ռուսաստանը պայքարում է, որպեսզի Բաշար Ալ-Ասադը Սիրիայում մնա իշխանության: Ռուսաստանը չափազանց հաճախ պաշտպանել է Իրանին կոշտ պատժամիջոցներից, որոնք անհրաժեշտ են եղել»,- հավելել է Ռոմնին:
Նա նաև հիշեցրել է, որ Ռուսաստանը ապաստարան է տրամադրել ԱՄՆ հատուկ ծառայությունների նախկին աշխատակից Էդվարդ Սնոուդենին:
