«Աշխատում ենք նոր կոնցեպցիաների մշակման ուղղությամբ, թե ինչպես պետք է զարգանա Հայաստանի տնտեսությունը և շուտով կներկայացնենք հանրությանը: Դա իր մեջ ներառում է ոչ միայն գաղափարական հենքը, այլ նաև կլինեն առաջարկներ հարկային բարեփոխումների վերաբերյալ: Վարչապետը բազմիցս խոսել է այն մասին, որ Հայաստանի տնտեսությունը պետք է ունենա ներառական աճ: Ներառականությունը ենթադրում է, որ տնտեսության աճին նպաստելու, հանրային բարիքի ստեղծմանը մասնակցելու հնարավորություն պետք է ունենան հանրության բոլոր անդամները»,- «Առաջին լրատվական»- ի հետ զրույցում այս մասին ասաց վարչապետի խորհրդական Վահե Հովհաննիսյանը՝ հավելելով, որ պետությունը հավասար հնարավորություններ պետք է ապահովի բոլոր քաղաքացների համար: Նրա հավաստմամբ՝ արտոնյալներ չեն լինելու:
Վարչապետի խորհրդականի խոսքով՝ տնտեսական ներառական աճը ներառում է նաև մենաշնորհների դեմ պայքարը: «Մենաշնորհների վերացման գործընթացը չի կարող լինել վայրկյանական: Բայց քանի որ արդեն վերացված են բոլոր խոչընդոտները շուկա մուտք գործողների համար, ապա ժամանակի ընթացքում կտեսնենք, որ նոր խաղացողներ ի հայտ կգան, արդեն տեղաշարժեր կան»,- նշեց Վ. Հովհաննիսյանը: Նրա հավաստմամբ՝ ներկայումս տնտեսական քաղաքականության խաղի կանոններն այլ են:
Վ. Հովհաննիսյանի հավաստմամբ՝ քանի որ հարկերից խուսափելու ստվերային խողովակները չկան, այդ գումարները հոսում են պետական բյուջե. «Բյուջեի եկամտային մասում մեծ աճ է նկատվում, որը շարունակական է, և այդ գումարները ուղղվելու են հանրային կարիքների բավարարմանը և հանրային բարիքի ստեղծմանը»:
Վարչապետի խորհրդականն անդրադարձավ նաև Հայաստանի տնտեսության խոցելի ոլորտներին:
Մանրամասն՝ տեսանյութում:
