Քաղաքաշինության կոմիտեի «Քաղաքաշինական բաց հարթակ» նախագծին առաջարկ է ներկայացրել ՏՏ պրոդուկտների զարգացման պատասխանատու Կարեն Բաղդասարյանը: «Արմենպրես»-ին այս մասին հայտնեցին ՀՀ քաղաքաշինության կոմիտեի մամուլի ծառայությունից: Ներկայացնում ենք քաղաքաշինության կոմիտեի ստացած առաջարկները.
- Մայթերի կանաչ կղզյակների ցանկապատում:
Քաղաքի մայթերի կանաչ հատվածների ցանկապատերը հիմնականում բացակայում են, արդյունքում կանաչ գոտու փոխարեն աղբով լի տարածք է: Եթե անգամ ցանկապատեր կան, դրանք շատ տգեղ են։ Մասնավոր կազմակերպությունները ինքուրույն՝ իրենց ճաշակին եւ հնարավորություններին համապատասխան են «բարեկարգում» այդ տարածքները։ Արդյունքում մենք ունենք շատ տգեղ ցանկապատեր՝ պատրաստված տարաբնույթ նյութերով ու ոճով։ Առաջարկվում է որոշակի նորմատիվներ մշակել մայթերի կանաչ հատվածների ցանկապատման համար, որպեսզի դրանք լինեն գեղեցիկ և այդ կղզյակներում ապահովեն կանաչի առկայությունը։
2. Քաղաքների վարչական շրջաններում դիզայների առկայություն։
Մեր քաղաքային միջավայրերը բարձիթողի վիճակում են։ Քաղաքը պետք է ունենա ոչ միայն գլխավոր դիզայներ կամ գլխավոր ճարտարապետ, այլև համապատասխան մասնագետներ, որոնց պատասխանատվության տակ կլինեն կոնկրետ շրջաններ /թաղամասեր։
Նրանց գործառույթը պետք է լինի իրենց հատկացված տարածքում շրջելը, առկա բոլոր խնդիրները արձանագրելը և համապատասխան պատասխանատուների հետ այդ ամենը ուղղելը (քանդված հենապատեր, դուրս ընկած մայթեզրային քարեր, անճոռնի ներկված պատեր, ցանկապատներ, բաց դիտահորեր, աղբի կուտակումներ, ծռված էլեկտրասյուներ, լուսասյուներ, նշաններ և այլն)։ Մի խոսքով շտկել և վերանորոգել այն ամենն, ինչ իր տեղում չէ, ինչը քանդված է, տգեղ է ներկված և այլն։ Նման գործառույթ ունեցող անձի առկայությունը կօգնի, որ խնդիրները պաշտոնապես արձանագրվեն, անընդհատ մի մարմնից մյուսը չուղարկվեն և արագ լուծվեն։
