Ռոբերտ Քոչարյանին մեղադրանք է առաջադրվել. նրան կալանավորելու միջնորդություն է ներկայացվել: «Թավշյա հեղափոխությունից հետո երկրում իրավիճակ է փոխվել. պատկան մարմինները ՀՀ երկրորդ նախագահի կալանավորման վերաբերյալ արել են այսպիսի հայտարարություն: Սպասենք հետագա զարգացումներին», «Առաջին լրատվական»- ի հետ զրույցում ասաց ԵԽ ԽՎ միջխորհրդարանական համագործակցության դիտորդական առաքելության դեպարտամենտի տնօրեն Շմավոն Շահբազյանը:
«Մեր երկրի վարկանիշը բարձրացել է: ԵԽ ԽՎ պատգամավորները զարմացած են, հիացած են հատկապես վերջին երկու ամիսներին տեղի ունեցող զարգացումների առումով՝ նկատի ունեմ կոռուպցիայի դեմ պայքարի կոնկրետ դրսևորումները: Շատ երկրներ կան, որտեղ կոռուպցիայի դեմ պայքարի հանձնաժողովներ են ստեղծվում, բայց կոնկրետ դեպքերի բացահայտմամբ Հայաստանը բացառիկ իրավիճակում է հայտնվել: Հավանաբար մեր գործադիր իշխանությունները կկարողանան սեմինարներ կազմակերպել եվրոպական երկրների ներկայացուցիչների համար, թե ինչպես պետք է ռեալ պայքարել կոռուպցիայի դեմ»,- նշեց Շահբազյանը:
«Էյֆորիան անցնում է: Գնացքը կարող է գնալ, և մենք կարող ենք ուշանալ. մենք ԵՄ-ում ունենք դիվանագիտական ներկայացուցչություններ, չգիտեմ՝ արդյո՞ք դիվանագետներն աշխատանք են տանում այդ երկրների քաղաքական և գործարար շրջանակներում՝ բացատրելով, թե ինչ է փոխվել մեր երկրում: Եթե այդ աշխատանքը չտարվի, եթե այդ առումով հույսը դնենք միայն Սփյուռքի վրա, համոզված չեմ, որ կունենանք մեծ արդյունքներ»,- մտահոգություն հայտնեց մեր զրուցակիցը:
Հայաստանի հպարտ քաղաքացիները պետք է իրավունք ունենան առանց վիզային ռեժիմի եվրոպական երկրներում ազատ տեղաշարժվել,- նշեց Շմավոն Շահբազյանը: Նրա կարծիքով՝ անհրաժեշտ է նաև փոքր և միջին բիզնեսի ոլորտում ներդրումներ ներգրավել. «Փոքր, բայց մեծ քանակի ներդրումները կարող են դինամիզմ հաղորդել մեր երկրի տնտեսությանը»:
Մանրամասն՝ տեսանյութում
