eBay ինտերնետային աճուրդը արգելել է Կանադայի բնակչին վաճառել վեց տարի առաջ գնած չիզբուրբերն ու տապակած կարտոֆիլը։ Այս մասին հաղորդում է Fox News-ը։
2012 թվականի հունիսին Դեյվ Ալեքսանդրը որոշել էր պարզել, թե արդյոք ճիշտ է, որ «Մակդոնալդսի» սնունդը չի փչանում։ Նա համոզված էր, որ դրանք պարզապես խոսակցություններ են։ Նա դստերն ուղարկել է չիզբուրգերի և ֆրիի հետևից, և երբ նա վերադարձել է, պահել է դրանք իր աշխատասենյակում, պահարանի հետևում։ «Մակդոնալդսի» սնունդը մնացել է այնտեղ վեց տարի։
Ի զարմանս Ալեքսանդրի՝ ուտելիքը պահպանել է իր ապրանքային տեսքը նույնիսկ վեց տարի անց։ «Կարտոֆիլը հրաշալի տեսք ունի։ Կոտլետը մի քիչ մգացել է։ Հացը պինդ է, բայց արտաքինից լրիվ նորի տեսք ունի»,– գրել է կանադացին։
Կանադացին որոշել է երկարակյաց ճաշը վաճառել համացանցում։ Նա վաճառքի է դրել այն eBay-ում 29 դոլարով և խոստացել է անվճար առաքել։ Աճուրդի ընթացքում գինն աճել ու հասել է 150 դոլարի։ Աճուրդը տևելու էր մինչև հուլիսի 12-ը, սակայն eBay-ը վեցամյա չիզբուրգերի դեպքում սննդամթերքի վաճառքի կանոնների խախտում է տեսել և փակել է աճուրդը։ Կանադացուն տեղեկացրել են, որ ուտելիքի վրա բացակայում է պիտանելիության ժամկետի մասին տեղեկատվությունը։
