Մշակույթի նախարարության լրատվական ծառայությունից «Առաջին լրատվական»-ին փոխանցեցին, որ արձակագիր Լևոն Խեչոյանին Հայաստան տեղափոխելու հետ կապված նոր բան չունեն ավելացնելու: Ինչպես հաղորդեցին, նախարարությունն առայժմ աջակցության տարբերակներն է քննարկում:
Հիշեցնենք, որ Լևոն Խեչոյանը գտնվում է Գերմանիայում, և նրան անհրաժեշտ է տեղափոխել Հայաստան: Արձակագիրը մոտ երկու շաբաթ առաջ այնտեղ ենթարկվել է երկրորդ վիրահատության: «Ցավոք, Գերմանիայում կյանքի սահմանագծին մաքառող Լևոն Խեչոյանի հետվիրահատական դրությունն օրհասական է: Բժիշկները խորհուրդ են տալիս անկողնային վիճակում Լևոնին տեղափոխել Հայաստան, ինչը ընտանիքի հնարավորությունների սահմաններից դուրս է: Տեղեկատվության նպատակն իրավիճակի մասին համապատասխան մարմիններին իրազեկելն է: Գերմանիայում բուժման կազմակերպման գործընթացին որևէ կերպ օժանդակություն չցուցաբերած ՀՀ կառավարությունը, կարծում ենք, հիմա արագ ինչ-որ բան պետք է ձեռնարկի»,- առավոտյան իր ֆեյսբուքյան էջում գրել էր Ծաղկաձորի Գրողների ստեղծագործական տան տնօրեն Մովսես Մանուկյանը:
Ինչպես ավելի վաղ նշել էինք, արձակագրին Հայաստան տեղափոխելու համար անհրաժեշտ է ինքնաթիռի սրահում մի քանի նստատեղ հանել, որ տեղ բացվի նրա անկողինը տեղավորելու համար: Բացի այդ, անհրաժեշտ է, որ նրան ուղեկցեն մի բժիշկ և մի բուժքույր: Այդ տեղափոխումն ապահովելու համար անհրաժեշտ են նաև կազմակերպչական և ֆինանսական հնարավորություններ, ինչն էլ առավոտից քննարկում են Մշակույթի նախարարությունում, և հայտնի չէ, թե երբ որևէ որոշում կկայացնեն:
Լուսանկարը՝ hetq.am-ի
