Այսօր Ազգային ժողովի արտահերթ նիստում ձայների 75 կողմ, 13 դեմ և 7 ձեռնպահ հարաբերակցությամբ առաջին ընթերցմամբ ընդունվեց «Բնապահպանական և բնօգտագործման վճարների մասին» ՀՀ օրենքում փոփոխություններ կատարելու մասին օրենքի նախագիծը:
ԲՀԿ խմբակցության քարտուղար Նաիրա Զոհրաբյանը նշեց, որ շատ ավելի համակարգված և ռադիկալ միջոցներ է պետք ձեռնարկել այս ուղղությամբ, ներկայացված նախագիծը չի լուծում բարձրացված խնդիրը:
«Խոշորները կվճարեն անհրաժեշտ վճարները, տուգանքները, արդյունքում կտուժեն փոքր և միջին ձեռնարկատերերը, և հերթական անգամ այս նախագիծը կնպաստի գնաճին: Մենք պատրաստ ենք բնապահպանների, բնապահպանական կազմակերպությունների հետ քննարկել խնդիրը և հանդես գալ առավել համապարփակ ռազմավարական նախագծով՝ այս խնդիրը կարգավորելու համար»,- ասաց նա:
Զոհրաբյանի խոսքով՝ քանի որ ԲՀԿ խմբակցությունում հարցի վերաբերյալ կան տարբեր տեսակետներ, խմբակցությունն այս նախագծի քվեարկության հարցում ազատ կլինի:
ՀՅԴ խմբակցության անդամ Արծվիկ Մինասյանը նշեց, որ ՀՅԴ-ն քվեարկությանը չի մասնակցում:
