Գարնանը օրգանիզմի հուզական գործընթացների զարթոնքին ձմռանը գալիս են փոխարինելու հակառակ պրոցեսները՝ պայմանավորված եղանակային պայմաններով ու օրվա ցերեկային ժամերի կրճատմամբ: Մարդու կենսառիթմերի փոփոխության հետ կապված՝ որոշակիորեն նկատվում է տեստոստերոնի սինթեզի նվազում, ինչը պատճառ է սեռական ցանկության նվազման:
Ձմռանը առավել հաճախ նկատվող սեռական խանգարումներից է սեռական ցանկության նվազումը, գլուխ են բարձրացնում բորբոքային հիվանդությունները, նկատվում է իմունիտետի անկում: Ձմռանը մարդիկ ավելի են հակված սակավաշարժության, ինչը կարող է նպաստել սեռական խանգարումների առաջացմանը:
Անդրադառնալով ձմռանը սեռական խնդիրների ակտիվացման խնդիրներին՝ լրագրողների հետ զրույցում ասաց Սեքսապաթոլոգիայի համալսարանական կլինիկայի ղեկավար Սևադա Հակոբյանը:
Նրա խոսքով՝ սեռական խանգարումների վրա կարող են ազդել տրամադրության անկումը, դեպրեսիան: Ձմռան ամիսներին եղանակային տատանումների նկատմամբ ավելի զգայուն են կանայք, քանի որ նրանց բնորոշ են փսիխոէմոցիոնալ տրամադրության անկումները, դեպրեսիան:
Մասնագետը խորհուրդ տվեց ձմռան ամիսներին տրամադրության անկումից խուսափելու և լավ ինքնազգացողություն ունենալու նպատակով նվազեցնել սննդամթերքի կալորիականությունը, օգտագործել մրգեր, բանջարեղեն, ձկնեղեն, ինչը կարող է խթանել այս ժամանակահատվածում արական սեռական հորմոնի սինթեզը:
