«Կառավարության ծրագիրն ես անվանեցի «Քաղաքացիական պայմանագիր» կուսակցության կամ Նիկոլ Փաշինյանի քաղաքականության ծրագիր՝ այն առումով, որ այս ծրագրում ամփոփված են այն բոլոր գաղափարները, որոնք այս թիմը ներկայացնում էր իր տարբեր հանրահավաքների, տարբեր հանդիպումների ժամանակ․ որևէ նոր բան չի ավելացել, այսինքն այն, ինչ-որ պարոն Փաշինյանը հայտարարել էր իր ելույթներում ու նախընտրական ծրագրում՝ այդ բոլորը հիմա ներառված է այս ծրագրում»,- «Առաջին լրատվական»-ի հետ զրույցում ընդգծեց Գործատուների հանրապետական միության նախագահ Գագիկ Մակարյանը՝ խոսելով կառավարության ներկայացրած ծրագրի մասին։
Անդրադառնալով ծրագրի տնտեսական հատվածին՝ Գագիկ Մակարյանը ուշադրություն հրավիրեց այն հանգամանքի վրա, որ ծրագրում չկան կոնկրետ ժամկետներ, թե ինչքան ժամանակահատվածում ինչ քայլեր են կատարվելու։ Մեր զրուցակիցը համարում է, որ կառավարության ծրագիրն ավելի լայնածավալ կգրվի ԱԺ-ի արտահերթ ընտրություններից հետո, երբ քաղաքական մեծամասնությունը կփոխվի և իշխող կառավարությունը կամրապնդի իր դիրքերը։
«Կառավարության ծրագրում գրված է, որ ամենաուշը մեկ տարի հետո տեղի կունենան արտահերթ խորհրդարանական ընտրություններ, հետևաբար այս ծրագիրն այդ տրամադրությունների շրջանակում է։
Ծրագիրը բաղկացած է 7 գլխից և այդտեղ 3 գերակա ուղղություններ են հռչակված՝ գյուղատնտեսություն, տեղեկատվական տեխնոլոգիաներ և զբոսաշրջություն, բայց տնտեսական հատվածներ կան նաև մնացած մասերի մեջ, օրինակ՝ կոռուպցիայի և ստվերի դեմ պայքարն ունի և սոցիալական և ֆիսկալ և տնտեսական նշանակություն, որովհետև մոնոպոլիաների վերացումը նշանակում է հավասար մրցակցային պայմանների ստեղծում, ստվերային շրջանառության կրճատում և այլն։
Առանձնահատուկ կանգ են առել ռազմարդյունաբերության վրա և ծրագրի մի կարևոր բաժին վերաբերում է ռազմական արդյունաբերության զարգացմանը և նշվում է, որ դա լոկոմոտիվային նշանակություն կարող է ունենալ․ ես պետք է ասեմ, որ ճիշտ կլինի, եթե հետագայում՝ որպես չորրորդ գերակայություն, անպայման, ուշադրություն դարձնեն արդյունաբերության վրա, քանի որ ռազմական արդյունաբերության զարգացումն առանց արդյունաբերության զարգացման՝ չի կարող տեղի ունենալ՝ դրանք իրար հետ փոխկապակցված են»,- շեշտեց բանախոսը։
Մանրամասները՝ տեսանյութում։
