Թուրքիայի քրդամետ Ժողովրդադեմոկրատական կուսակցության անդամ, խորհրդարանի հայազգի պատգամավոր Կարո Փայլանը հայտարարել է, որ Թուրքիայում սկիզբ առած տնտեսական ճգնաժամը հետևանք է մեկ այլ՝ ժողովրդավարական ճգնաժամի։ Այս մասին նա գրել է Twitter-ի իր պաշտոնական էջում։
«Տնտեսական ճգնաժամի իրական հիմքը ժողովրդավարական ճգնաժամն է։ Միապետությունն է, որը սպառել է վստահությունն իր հանդեպ։ Մենք վերջ կդնենք ժողովրդավարական ճգնաժամին՝ հաղթահարելով նաև տնտեսական ճգնաժամը»,- գրել է Փայլանը։
Ավելի վաղ Կարո Փայլանը նախազգուշացրել է թուրքական իշխանություններին հնարավոր տնտեսական ճգնաժամի մասին։ Ըստ Փայլանի՝ եթե իշխանությունները ոչինչ չձեռնարկեն, ապա Թուրքիայում մոտ ապագայում կարող է կրկնվել 1994-ի և 2001-ի տնտեսական ճգնաժամը:
