«Վարչապետի կոչն ուղղված զինծառայողների ծնողներին՝ շատ ճիշտ է ու տեղին, քանի որ առաջին հերթին հենց ծնողները պիտի հասկանան, որ իրենց որդին պետք է պատասխանատվություն ունենա նաև, ինչու ոչ, իր կրած զինվորական համազգեստի նկատմամբ․ հասկանում եմ, որ դժգոհություններ կան, թե համազգեստը շուտ է մաշվում կամ պատռվում է և այլն և այլն, բայց ըստ իս՝ այդ ասեկոսեները մի փոքր չափազանցված են, մյուս կողմից էլ՝ ես չէի ասի, որ ներքնազգեստն ու հիգիենիկ պարագաներն առաջնային խնդիր են բանակում, բայց, իհարկե, ցանկացած խնդիր պետք է լուծում ստանա, այսինքն եթե կա հնարավորություն այդ ամենն ավելի բարելավելու, նորացնելու, ապա պետք է արվի»,- «Առաջին լրատվական»-ի հետ զրույցում ընդգծեց կինոռեժիսոր, «Դիրքերում» հաղորդաշարի հեղինակ Արշակ Զաքարյանը՝ անդրադառնալով վարչապետ Նիկոլ Փաշինյանի կոչին։
Հիշեցնենք, որ օրերս իր ուղիղ եթերներից մեկի ժամանակ վարչապետ Նիկոլ Փաշինյանն անդրադառնալով զինծառայողների համազգեստին ու հիգիենիկ պարագաներին՝ կոչ արեց ծնողներին, որպեսզի նրանք այդպիսի պարագաներ այլևս չգնեն և չուղարկեն զորամասեր, քանի որ ՀՀ ԶՈՒ-ն կարողանում է պատշաճ մակարդակով հոգալ այդ հարցը։
Արշակ Զաքարյանի դիտարկմամբ՝ այս առումով հատկապես վերջին տարիներին դրական փոփոխությունն ակնհայտ է՝ գրեթե բոլոր զորամասերում բարելավել է թե զինվորական համազգեստի որակը, թե զինծառայողներին տրամադրվող սննդամթերքի որակը, ինչպես նաև էականորեն փոխվել են զինծառայողների և սպայական կազմի միջանձնյա հարաբերությունները, դրական տեղաշարժն ըստ Զաքարյանի՝ ակնհայտ է։
«Այդ ամենում մեծ ներդրում ունի Սեյրան Օհանյանը, նրանից հետո Վիգեն Սարգսյանը և ես համոզված եմ, որ այդ դրական փոփոխությունները հիմա էլ կշարունակի նորանշանակ նախարար Դավիթ Տոնոյանը։
Աշխարհում չկա որևէ բանակ, որ խնդիր կամ թերություն չունենա, սակայն դրանք բոլորը ներքին կարգով լուծվող հարցեր են․ իմ սկզբունքը հետևյալն է՝ բանակի մասին կամ լավը կամ ոչինչ և մեծ ուրախությամբ պետք է նշեմ , որ դրական բաներն ավելի շատ են, քան բացասականը, ես տարբեր դիրքերում եմ լինում, տարբեր զորամասեր եմ այցելում և միանշանակ կարող եմ պնդել, որ շատ լուրջ փոփոխություններ ենք արձանագրել»,- հավելեց մեր զրուցակիցը։
Մանրամասները՝ տեսանյութում։