Եվրոպայի հյուսիսային երկրներում ցիկլոնին առնվազն 10 մարդ է զոհ դարձել:
Ավելի վաղ նշվում էր 5 զոհի մասին: Շվեդիայում փոթորկի ժամանակ 2 ծովագնաց է ջրասույզ եղել, Դանիայում մի կին է զոհվել` ավտոմեքենայում, ևս 2 մարդ զոհվել է Անգլիայի հարավում:
Մամուլի տվյալներով` ևս 3 մարդ զոհվել է Լեհաստանում: Անձրևով ուղեկցվող ուժգին քամին մասնակիորեն խաթարել է տրանսպորտային շարժումը Մեծ Բրիտանիայի մի շարք շրջաններում, որտեղից իշխանությունները կարգադրել են տարհանել 15 հազար մարդու:
Շոտլանդիայում ժամանակավորապես դադարեցվել է գնացքների տեղաշարժը և ընդհատվել են չվերթները Էդինբուրգի օդանավակայանում: Քամու պատճառով երկրի տարբեր հատվածներում հարյուրավոր ծառեր են տապալվել, վնասվել են էլեկտրահաղորդալարերը:
Հյուսիսային Եվրոպայի մի շարք երկրներում հարյուրավոր չվերթներ են հետաձգվել:
Լեհաստանում մոտ 400 հազար, իսկ Շվեդիայում ավելի քան 50 հազար մարդ մնացել է առանց լույսի, հաղորդում է Ria Novosti-ն:
