ՌԴ նախագահ Վլադիմիր Պուտինի այցի ընթացքում մի շարք զավեշտալի իրավիճակների ականատես եղանք: Երբ մարդկանց հանել էին փողոց դրոշներով դիմավորելու Պուտինին, արգելել էին լվացք փռել, առանձնահատուկ ձևով զարդարել էին Գյումրու թատրոնի շենքը, որտեղ պետք է կայանար հայ-ռուսական տնտեսական ֆորումը: Իսկ ավելի ուշ նույն թատրոնի բակից հավաքվեց արհեստական կանաչը, անգամ տնկված փոքրիկ եղևնիները: Այս և մի քանի այլ հարցերի շուրջ «Առաջին լրատվական»-ը զրուցեց Շիրակի Մարզպետ Ֆելիքս Ցոլակյանի հետ:
– Պարոն Ցոլակյան, ինչպե՞ս եք գնահատում Պուտինի այցը, գոհ ե՞ք:
– Ոնց պիտի գնահատեմ: Դրական:
– Պուտինի այցի պատճառով Գյումրիում թաղումներ ու հարսանիքներ էին հետաձգվել, մարդկանց զգուշացրել էին լվացք չկախել, մարդկանց փողոց էին հանել: Ինչպե՞ս եք գնահատում նմանօրինակ քայլերը:
– Դրանք սուտ բաներ են: Դրանք մեկի հորինած բաներն են: Ինչի եմ ասում սուտ է, որովհետև մենք նույնիսկ մարդկանց չէինք հրավիրել ընդունելություններին, որ գային մասնակցեին և այլն: Մենք մարդ չենք հանել փողոց, բացարձակ: Ինչ եղել է՝ ինքնաբուխ է եղել: Սա իրական վիճակն է եղել: Մնացածը բացարձակ սուտ է: Ոնց կարող է մենք արգելեինք, ասեինք՝ թաղում մի արեք, կամ հարսանիք մի արեք: Դա ինչ ասելու բան է: Կարող է մի հատ անհարմարություն եղած լինի հարսանիքի հետ կապված: Խոսակցություն կար, որ ասել են այդ պահին ճանապարհը փակ է, մյուսով գնացեք: Ուրիշ ոչ մի բան:
– Պետական ծառայողներն էլ էի՞ն ինքնաբուխ դուրս եկել փողոց Պուտինին դիմավորելու:
– Ինչ պետական ծառայող: Ես մտել եմ քաղաք, օդանավակայանի ճանապարհին մարդիկ էին կանգնած, ես չգիտեի ովքեր են, ոչ մեկին չէի ճանաչում: Ընդհանրապես որևէ դպրոցի հետ, որևէ աշակերտի մասով պայմանավորվածություն չի եղել: Մենք մարդկանց փողոց չենք հանել, ես դա ասում եմ ազնվորեն:
– Լավ, բա այցից հետո թատրոնի բակի եղևնիներն ինչո՞ւ հանվեցին:
– Դրանք դեկորատիվ, չաճող բաներ են, դա դրել էին, մենք չէինք դրա հեղինակը, դեկորացիաներով զբաղվողներն էին արել: Հիմա դրանք հանվել են, որ տեղը նոր աճող բան դրվի, թե չէ դա չէր աճում: Տարածքը կբարեկարգվի, կկանաչապատվի, և աճող ծառեր կդրվեն:
– Պարոն Ցոլակյան, այցի ժամանակ մի շարք ակցիաներ եղան Գյումրիում և Երևանում, 100-ից ավելի մարդ ձերբակալվեց: Ինչպե՞ս եք գնահատում ոստիկանության գործողությունները:
– Տեղյակ չեմ ընդհանրապես, Գյումրիում ոչինչ չի եղել: Մնացածից տեղյակ չեմ, ընդամենը կարդացել եմ ինտերնետում: Իսկ ընդհանրապես ես կողմնակից եմ, որ էս երկու երկրների մեջ հարաբերությունները պետք է խորանան: Իսկ այցը դրան էր միտված, և պետք է անընդհատ գնալ այդ ճանապարհով:
Լուսանկարները՝ aravot.am-ի
