2006 թվականից գործող «Ակտիվ երիտասարդ քաղաքացիների նախաձեռնություն» հասարակական կազմակերպությունը մինչ այժմ հիմնական աշխատանքով է ապահովել երեք երիտասարդների, ովքեր նախ համապատասխան մարմիններում երկամսյա պրակտիկա են անցել: Այսօր տեղի ունեցած մամուլի ասուլիսի ժամանակ այս մասին հայտարարեց ՀԿ-ի փոխնախագահ, «Հայ կամավորների բանկ» ծրագրի ղեկավար Մարինե Եղոյանը` հավելելով, որ առ այսօր իրենք իրականացրել են բազմաթիվ սեմինարներ, հանդիպումներ են ունեցել տարբեր օղակների հետ:
«Ծրագրի հիմնական նպատակն է ստեղծել կամավորական բազա, երիտասարդներին կամավորական աշխատանքի պրակտիկա տրամադրել: Մենք իրականացրել ենք «Կամավորությունը ևս աշխատանք է» վեցամսյա ծրագիրը` դրա շրջանակում աշխատելով ամենամեծ պահանջարկն ունեցող մասնագիտությունների երիտասարդների` միջազգայնագետների, տնտեսագետ-հաշվապահների և իրավաբանների հետ:
Մենք կապող օղակ ենք հանդիսացել և հանդիսանում տարաբնույթ ընկերությունների և կամավոր աշխատանքի պատրաստ երիտասարդների միջև: Վերջիններիս հնարավորություն ենք ընձեռել հատուկ բաժնում գրառում անել` որ ընկերությունում և ինչ մասնագիտությամբ կցանկանային կամավոր աշխատանք իրականացնել: Եվ հակառակը` ընկերությունները հնարավորություն ունեն նշելու` որ պաշտոնի, ինչ ժամկետների համար են իրենց կամավորներ անհրաժեշտ»,- ասաց նա:
Մարինե Եղոյանի խոսքով, իրենց ՀԿ-ի օգնությամբ 60 երիտասարդ այս պահին պրակտիկայի մեջ են: «Նրանց պրակտիկան կավարտվի միայն հունվարին, և հույս ունենք, որ երիտասարդների զգալի մասը տարբեր ընկերություններում հիմնական աշխատանք կգտնի:
Օգոստոսից մեկնարկած ծրագրի արդյունքում ունենք 3 երիտասարդ, որոնք կամավորությունից անցում են կատարել հիմնական աշխատանքի. Մեկը՝ բանկային ոլորտում, մյուսը` հասարակական սեկտորում, երրորդը` միջազգային կազմակերպությունում»,- տեղեկացրեց նա` հավելելով, որ իրենց ՀԿ-ն համագործակցում է ԱԺ-ի, ՄԻՊ-ի, Արդարադատության և Մշակույթի նախարարությունների, Երևանի քաղաքապետարանի, Հայկական Կարմիր խաչի, իրավաբանական գրասենյակների, ապահովագրական ընկրությունների հետ:
Ասուլիսի մյուս բանախոս, կամավորական ծրագրի մասնակից Վիկտորյա Այդինյանն էլ նշեց, որ այս պահին ինքը պրակտիկա է անցնում ՄԻՊ-ի գրասենյակում, հմտանում մասնագիտական թարգմանություններ, փաստաթղթեր կազմելու մեջ: «Հայաստանում, եթե համալսարանը չես ավարտել, շատ դժվար է պետական կառույցներում պրակտիկա անցնել, ուր մնաց՝ աշխատանք գտնել: Հենց այս ծրագիրն է, որ ինձ հնարավորություն տվեց դրսևորվելու, հույս ունենալու, որ համալսարանական կրթությունն ավարտելուց հետո աշխատանք կունենամ»,- ասաց նա:
