ՀՀԿ-ից որևէ մեկը չի կարող լինել վարչապետ կամ վարչապետի թեկնածու: Այդ մասին միջազգային լրատվամիջոցների համար տված մամուլի ասուլիսի ժամանակ հայտարարել է Նիկոլ Փաշինյանը:
Փաշինյանը նաև նշել է, որ իր առաջ քաշած քաղաքական օրակարգի առաջին կետը Սերժ Սարգսյանի հրաժարականն էր, և դա կատարվել է։ Երկրորդը ժողովրդի թեկնածուի նշանակումն էր, և ՀՀԿ-ից որևէ մեկը չի կարող լինել վարչապետ կամ վարչապետի թեկնածու․ «ՀՀԿ կառավարման ժամկետը վերջացել է։ Այդ կուսակցությունը վերածնելու որևէ փորձ արդյունք չի տալու: Եթե ժողովուրդն ինձ վրա դնի այդ պարտականությունը, ես դա կվերցնեմ։ Կա մեծ հավանականություն, որ հենց այդպես էլ կլինի։ Այստեղ մենք խոսում ենք մեր հայտարարած կետերից երրորդի մասին։ Մենք պետք է երաշխավորենք բացարձակ ազատ, օրինական ընտրություններ, որովհետև վստահ ենք, որ ճգնաժամը սկսվեց, երբ մարդիկ սկսեցին չվստահել ընտրություններին: Առաջին բանը, որ պետք է անենք, ընտրական օրենսգրքի փոփոխությունն է, ու քաղաքական կուսակցությունների մասին օրենքի փոփոխությունը: Դա լինելու է ոչ այլ ինչ, քան քաղաքական գործունեություն: ՀՀԿ-ն այժմ չունի իշխանություն»։
