ԱԺ նախկին պատգամավոր, ՀՀԿ-ական, «Լուսակերտ» տոհմային թռչնաբուծական ֆաբրիկայի սեփականատեր Խաչիկ Մանուկյանի խոսքով՝ Ամանորի նախաշեմին ձվի շուկայում դեֆիցիտ չի առաջանա, գներն էլ, նախօրդ տարվա օրինակով, կտրուկ չեն բարձրանա:
«Ինձ թվում է՝ խնդիրներ չեն առաջանա: Հիմա մենք ամեն ինչ անում ենք դրա համար: Պարսկաստանից, Ուկրաինայից, Վրաստանից, Ռումինիայից, Թուրքիայից ձու ներկրելով շուկան կարգավորում ենք, որպեսզի տարեվերջին խնդիրներ չառաջանան»,- «Առաջին լրատվական»-ի հետ զրույցում ասաց Խաչիկ Մանուկյանը՝ ավելացնելով:
«Գները նույնպես չեն բարձրանա: Գինը կմնա նույնը, ինչ այսօր է: Իսկ եթե գինն էլ բարձրանա, ապա դա արտադրողների հետ կապ չի ունենա, այլ առաքիչների, վերավաճառողների և այդ տիպի մարդկանց հետ: Խնդիրներ կան, բայց դա էլ շուկայի ինտրիգներն են»,- ասաց նա:
Մանուկյանը ցավում է, որ Հայաստանը ձու արտահանող երկրից դարձավ ներկրող. «Եթե նախկինում մենք արտահանող էինք, հիմա ներկրող երկիր ենք դարձել տնտեսության վիճակի ու վատ մենեջմենթի պատճառով: Այս վիճակը եկավ գերարտադրությունից: Բալանս չկար: Վրաստանը ճանապարհը փակեց, Իրանը մեր ձուն չէր տանում, էլ տեղ չունեինք տանելու: Այլ տեղեր արտահանելու համար էլ ինքնարժեքի ու գների խնդիր կա, որի մեջ չենք տեղավորվում: Դրա համար էլ մեզ մոտ ձվի ավելցուկ եղավ, ինչի համար էլ դրեցին ու հավերը մորթեցին, հետո տեսան, որ հավը պակասեց: Դե, հավը պակասեց, ձուն էլ պակասեց, ու այդպես որոշեցին ձու ներկրել»:
«Լուսակերտի» սեփականատերը նոր մեխանիզմներ է մշակել, որպեսզի տոնական և նախատոնական օրերին ձվի գնի տատանումներ և դեֆիցիտ չառաջանան, միայն թե այդ նոր մեխանիզմը գործի կդրվի հաջորդ տարվանից: «Այդ նոր մեխանիզմի համաձայն՝ Զատիկին, Նոր տարուն և այլ տոնական օրերի հավկիթի գինը կիջնի, հավկիթը կվաճառվի նվազագույն գնով: Դա իմ մշակած ծրագիրն է, որը պատրաստվում եմ քննարկել նաև մեր մրցակից ընկերությունների հետ»,- ասաց Մանուկյանը:
Նախկին պատգամավորը ուրախ է, որ Հայաստանը գնում է Մաքսային միություն: Ասում է՝ բոլոր առումներով ավելի լավ է, քան Եվրոպան: Եվրոպայից միայն վատ բաներ են գալիս: «Ամբողջ օրը տրանսվեստիտներից ու «գալուբոյներից» են խոսում, մենակ էդ ա մեր թեման: Բա դա Եվրոպայից է գալիս, հո Ռուսաստանից չի գալիս»,- զարմանում է Մանուկյանը, ապա շարունակում թվարկել Մաքսային միության մյուս դրական կողմերը:
«Ինչ վատ ա Ռուսաստանը, գոնե մի երկու բառ գիտենք ռուսերեն, թե չէ՝ գնում ենք Իրան, ոչ լեզու գիտենք, ոչ բան, 10 մարդ էլ հետներս ենք տանում, որ իրար լեզու հասկանանք: Հետո էլ գնում ես՝ պիտի «ֆորմա ադեժդան» տեղը լինի, աղջիկ-տղա իրար հետ չքայլեն, խմել չկա… ու հազար ու մի բան կա: Մենք չենք կարողանում մերվել իրենց հետ: Թուրքերի, ադրբեջանցիների հետ տնտեսական կապ չկա: Վրաստանում անհասկանալի է վիճակը՝ մեկ ընդունում են ապրանքը, մեկ՝ չէ: Սա անելով (նկատի ունի Մաքսային միությանը միանալը) գոնե մի պլյուս էլ ենք դնում»:
Ինչ վերաբերում է կոնկրետ իր բիզնեսին, ապա Մանուկյանն անկեղծանում է. պատգամավոր չլինելն ավելի է նպաստել իր բիզնեսի ծաղկմանը: Պատգամավոր ժամանակ կաշկանդող հանգամանքներ կային, իսկ հիմա ազատ է և հանգիստ բիզնեսով է զբաղվում:
