Ռուսաստանը և Սիրիան փորձում են խոչընդոտել Քիմիական զենքի արգելման կազմակերպության (ՔԶԱԿ) տեսուչների մուտքը Դումա քաղաք, որպեսզի թաքցնեն այնտեղ քիմիական զենքի կիրառման ապացույցները։ Այս մասին հայտարարել է ԱՄՆ պետդեպի պաշտոնական ներկայացուցիչ Հիզեր Նաուերթը։
«Մենք արժանահավատ տեղեկություն ունենք, որը վկայում է այն մասին, որ ռուսական իշխանություններն աշխատում են սիրիական ռեժիմի հետ, որպեսզի արգելեն և հետաձգեն տեսուչների այցը Դումա»,-ճեպազրույցի ժամանակ ասել է Նաուերթը։
Պետքարտուղարությունում կարծում են, որ Ռուսաստանը և Սիրիան մտադիր են Դումայում «սեփական բեմականացված հետաքննությունն» անցկացնել։
«Ռուսական իշխանություններն աշխատել են սիրիական ռեժիմի հետ, ինչպես մենք ենք եզրակացնում՝ ենթադրյալ հարձակումների վայրերը վարակազերծելու և քիմիական զենքի կիրառման ապացույցները վերացնելու համար»,-հավելել է պետքարտուղարության ներկայացուցիչը։
Նրա խոսքով՝ ՌԴ-ն և Սիրիան փորձել են ճնշում գործադրել որոշ մարդկանց վրա, որպեսզի «նրանք փոխեն իրենց պատմությունն այդ գիշեր կատարվածի վերաբերյալ»։
«Որպեսզի չթվա, թե քիմիական հարձակման մեջ Ռուսաստանը և Սիրիան են մեղավոր, իսկ մենք հաստատ գիտենք, որ Սիրիան մեղավոր է հարձակումների մեջ»,-նշել է Նաուերթը։
