Սերժ Սարգսյանը ամենաբարձր գնահատականի է արժանի, ես բարձր եմ գնահատում իր ղեկավարած տարիներին ունեցած մեր ձեռքբերումները։ Այդ մասին «Առաջին լրատվական»-ի հետ զրույցում նշեց ՀՀԿ խմբակցության պատգամավոր Տաճատ Վարդապետյանը։
«Իհարկե, ունեցել ենք նաև բացթողումներ, անթերի գործընթաց չկա։ Միայն սահմանների անառիկությունն արդեն ամենաբարձր գնահատականի է արժանի։ Մեր երկիրը արդեն 30 տարի է՝ օդային ճանապարհով է ներմուծումներ անում, շրջափակված ենք հարևան երկրների կողմից։ Այդ ամենը հաշվի առնելով, ես հանգում եմ այն եզրակացության, որ ճիշտն այն է, որ մեր երկրի ձեռքբերումները շարունակվեն նրա ղեկավարությամբ»,- ասաց նա։
Դիտարկմանը, որ շատերը նշում են, որ Սերժ Սարգսյանի օրոք Հայաստանում մեծ տեմպերով արտագաղթ է եղել, մեկ միլիոն աղքատներ կան երկրում, սոցիալական ծանր վիճակում է հասարակությունը, Քառօրյա պատերազմում տարածքներ կորցրեցինք, Վարդապետյանն արձագանքեց. «Կիսատ լցված բաժակի վերաբերյալ երկու բնութագրում գոյություն ունի։ Մի դեպքում կարելի է ասել՝ բաժակը կիսով չափ լիքն է, մյուս դեպքում՝ կիսով չափ դատարկ է։ Ես կարող եմ մատներս ծալել ու հակափաստարկներ բերել։ Իհարկե, արտագաղթ կոչվածը տհաճ, ազգի համար ոչ պիտանի գործընթաց է։ Բայց արտագաղթը մի այնպիսի երևույթ է, որ մարդը միշտ չէ, որ գնում է աղքատությունից դրդված, հաճախ բարեկեցության նոր ափեր են փնտրում մարդիկ։ Ապրելու կենսակերպին նոր որակ ապահովելու համար են գնում»։
Ամբողջությամբ՝ տեսանյութում։
