Մենք 22 տարի առաջ ենք ընտրել այս ուղին և ՀՀ ներկայիս անվտանգության համակարգը: Այս մասին այսօր քաղաքական գործիչների և վերլուծաբանների հետ «Վիլնյուսյան գագաթնաժողով. քաղաքական պարտությո՞ւն, թե՞ նոր հնարավորություններ Հայաստանի համար» թեմայով քննարկման ժամանակ ասաց Ազգային ժողովի ՀՀԿ խմբակցության քարտուղար Հովհաննես Սահակյանը: Նա նշեց, որ ընդհանուր առմամբ սեպտեմբերի երեքից հետո պատկերացումները և այն խնդիրները, որոնք դրված էին Հայաստանի առջև, չեն փոխվել:
«Երբ սեպտեմբերի երեքին եղավ քաղաքական հայտարարությունը, որ անդամակցելու ենք ՄՄ-ին, մեր ընդդիմախոսները վատատեսական բնութագրերով էին հանդես գալիս, բայց եվրոպական կողմը կարծիքներ հայտնեց, որ շարունակելու են մեր հետ գործընթացը՝ քաղաքական, կրթական, տնտեսական և այլ ոլորտներում: Սա նույնպես շատ կարևոր է, Վիլնյուսով չի սկսվելու և ավարտվելու»,- ասաց Հովհաննես Սահակյանը:
Վերջինս տեղեկացրեց, որ սեպտեմբերի երեքից հետո ՀՀ-ԵՄ աշխատանքները շարունակվել են, նոր փաստաթղթի ձևավորման շուրջ աշխատանքներ են ընթացել:
«ԱԳ նախարարը նշել է, որ պատշաճ ժամկետում կտեղեկանանք այդ մասին: Ես կարծում եմ, որ այս կարևորագույն խնդրի մեջ սա ամենակարևորը չէ: Մենք պետք է հասկանանք, թե ուր ենք գնալու, և մենք 22 տարի առաջ ենք ընտրել այս ուղին, ոչ այսօրվա ու ոչ էլ երեկվա նախագահն է ընտրել սա, թերևս առաջին նախագահն է ընտրել: Չի կարելի է ունենալ մեկ անվտանգության համակարգ. ունենալ ԼՂ խնդիր, ունենալ 2 մլրդ-ի հասնող ռազմական բյուջե ունեցող Ադրբեջանի նման թշնամի և դա համադրել մեկ երկրի 300 մլն ռազմական բյուջեով»,- ասաց Հովհաննես Սահակյանը:
