Ադրբեջանի դատարանը 3 մարդու դատապարտել է ցմահ ազատազրկման: Նրանք մեղադրվում են մի շարք ահաբեկչությունների նախապատրաստման մեջ՝ փոխանցում է Reuters-ը: Նույն գործով անցնող ևս 26 մեղադրյալ դատապարտվել են մի քանի տարվա ազատազրկման:
29 մարդ ձերբակալվել է 2012-ի ապրիլին՝ Բաքվում անցկացված «Եվրատեսիլ» մրցույթից մեկ ամիս առաջ: Նրանք բոլորը մեղավոր են ճանաչվել Ադրբեջանի նախագահ Իլհամ Ալիևի դեմ մահափորձ կազմակերպելու մեջ, ինչպես նաև հարձակումներ նախապատրաստելու մի շարք այլ թիրախների դեմ, այդ թվում՝ ոստիկանների, հյուրանոցի և կառավարական շենքերի:
Ադրբեջանի կառավարությունը հայտարարել է, որ վճռական է իսլամիստների կողմից սպառնալիքին հակահարված տալու հարցում: Երկրի ՆԳՆ-ը հայտնել է, որ խմբի անդամներն ուսուցանվել են մի շարք իսլամական երկրներում, այդ թվում՝ Իրանում, Սիրիայում և Պակիստանում, և որ խմբի առաջնորդը՝ Ադրբեջանի քաղաքացի Վուգար Պադարովը, սպանվել է ձերբակալության ժամանակ:
