Այսօր արդեն հրապարակվեց «Քաղաքացիական պայմանագիր» կուսակցության պայքարի ճանապարհային քարտեզը, ըստ որի՝ 14 օր շարունակ քայլարշավ է լինելու. ապրիլի 13-ին հասնելու են Ազատության հրապարակ:
«Մենք սրանով օրակարգ ենք բերում այն թեման, ինչի մասին խոսել ենք, և ինչի դեմ պայքարում ենք՝ ընդդեմ Սերժ Սարգսյանի 3-րդ ժամկետի և Հանրապետական կուսակցության»,- «Առաջին լրատվական»-ի հետ զրույցում ասաց Երևանի ավագանու «Ելք» խմբակցության անդամ Արայիկ Հարությունյանը՝ հավելելով, որ այս փուլը կարևոր է, որպեսզի մարդիկ ներգրավվեն պրոցեսի մեջ:
Մեր զրուցակցի խոսքով՝ միայն Ազատության հրապարակ գնալը կլիներ միօրինակ՝ ընդդիմությունն անցել է այդ փուլը:
«21-րդ դարի բոլոր հնարավոր տեխնիկական միջոցներով մենք իրազեկում ենք այս ակցիայի մասին: Մեր կարծիքով՝ 14 օրը այն օպտիմալ ժամանակամիջոցն է, որի ընթացքում մենք կարող ենք քաղաքացուն հասցնել մեր ուղերձները»,- նշեց նա՝ հույս հայտնելով, որ մարդիկ ակտիվություն կդրսևորեն:
Արայիկ Հարությունյանը տեղեկացրեց, որ ամսի 13-ին մտնելու են Երևան և ժամը 18:30-ին Ազատության հրապարակում անցկացնելու են հանրահավաք. «Երևանում արդեն 4 օրերը լինելու են շուրջօրյա հանրահավաքներ՝ քաղաքացիական անհնազանդության պայքարի բոլոր խաղաղ միջոցների օգտագործմամբ»:
Ինչպես ասաց Արայիկ Հարությունյանը՝ իրենց քայլարշավում ընդգրկել են ՀՀ մեծ քաղաքները՝ Գյումրի, Վանաձոր, Հրազդան, Դիլիջան, Սևան, Աբովյան. «Հարավի մեր բնակիչներից ներողություն ենք խնդրել և կոչ ենք արել ամսի 13-ին միանալ մեզ՝ արդեն Երևանում: Մեր հիմնական նպատակը քաղաքացու հաղթանակն է»:
Ինչ վերաբերում է համակարգային փոփոխություններին, Արայիկ Հարությունյանը նկատեց. «Սերժ Սարգսյանը ստեղծված համակարգի մարմնավորումն ու ղեկավարն է: Եվ եթե մենք հասնենք նրան, որ Սերժ Սարգսյանը չառաջադրվի, ապա մենք կարող ենք ասել, որ, այո, ժողովուրդը հասել է լուրջ հաջողության, և այդ հաջողությունը պետք է զարգացնել՝ մինչև այդ համակարգի ապամոնտաժումը»:
Մանրամասները՝ տեսանյութում:
