«Ես մարտի 10-ին մասնակցում էի հանրահավաքին, գտնվում էի մարդկանց շարքերում։ Իմ քաղաքական պայքարի ընթացքում երբեք չեմ ձգտել հարթակին»,- «Առաջին լրատվական»-ի հետ զրույցում ասաց ՀԺԿ նախկին համակիր, ընդդիմադիր գործիչ Գրիշա Վիրաբյանը։
Նա ասաց, որ հաջորդ հանրահավաքին նորից մասնակցելու է, ելույթ է ունենալու։ «Շատ ուրախ եմ, որ առաջին հանրահավաքին այդքան մարդ էր եկել։ Երիտասարդությունն էր սակավ, ուսանողությունը, բայց ինձ թվում է՝ առաջիկայում այդ բացը կլրացվի։ Սերժ Սարգսյանը թող հույս չունենա, թե ժողովրդի պասիվության, հոգնածության պարագայում ինքը դեռ կարողէ ղեկավարել։ Նա ամբողջությամբ սպառել է իրեն։ Անգամ որոշ ՀՀԿ-ականներ, ովքեր փորձում են պաշտպանել Սերժ Սարգսյանի թեկնածությունը, նրան անփոխարինելի են համարում, նրանք անմիջապես ձեռք են բերում քաղաքական պոռնիկի կարգավիճակ։ Մինիմում»,- հավելեց Վիրաբյանը։
Գրիշա Վիրաբյանն ասաց, որ մարտի 30-ին պատրաստվում է ելույթ ունենալ և խոսել աղաղակող փաստերի մասին, որոնք փաստում են Հայաստանի իշխանությունների և եվրոպական երկրների դեսպանություների միջև ստվերային գործարքների մասին։
Վիրաբյանի խոսքերով՝ իր այդ փաստերը զսպող դեր կունենան, որպեսզի իշխանությունները հանրահավաքների ժամանակ ուժ չկիրառեն ժողովրդի նկատմամբ՝ ինչպես Մարտի 1-ին։ «Ես հասնելու եմ նրան, որպեսզի ներքին կարգով իշխանություններին զգուշացվի, որպեսզի ուժ չկիրառվի ժողովրդի նկատմամբ։ Իմ իմացածի 50 տոկոսը, եթե ես ասեմ, ապա դրսի ուժերը կսաստեն իշխանություններին, որովհետև իրենց պատվի հարցն էլ է։ Ես կհրապարակեմ իմ ձեռքի տակ եղած նյութերը և ամեն ինչ պարզ կլինի»,- ասաց Վիրաբյանը։
Վիրաբյանը վստահ է, որ իրենց պայքարը հաջողությամբ կպսակվի։
Առավել մանրամասն՝ տեսանյութում։
