Պետդեպի ներկայացուցիչ Հիզեր Նաուերթը հայտարարել է, որ իրավիճակն Արևելյան Ղութայում վկայում է Աստանայում Սիրիայի հարցով բանակցային գործընթացի տապալման մասին։ Նրա խոսքով՝ դեէսկալացիոն գոտիների ստեղծումը եղել է «կեղծիք», իսկ Ռուսաստանը «եզակի պատասխանատվություն» է կրում ամենի համար, ինչ տեղի է ունենում Սիրիայում։ Այս մասին հայտնում է Պետդեպի կայքը։
Լարվածության էսկալացիան Դամասկոսի արվարձան հանդիսացող Արևելյան Ղութայում, որը գտնվում է սիրիական ընդդիմության վերահսկողության տակ, սկսվել է փետրվարի 20-ին։ ԱՄՆ իշխանությունները հարձակումների և խաղաղ բնակիչների մահվան մեջ մեղադրում են անմիջականորեն Ռուսաստանի իշխանություններին։
Պետդեպի ներկայացուցիչը նշել է, որ Ռուսաստանն ու Իրանը եղել են Աստանայի երաշխավորներ։ «Նրանք ստեղծել են դեէսկալացիոն գոտիներ, և դրանցից մեկը եղել է Արևելյան Ղութան։ Նրանք այնտեղ մարդկանց սովամահ են արել, չեն թողել այնտեղ մարդասիրական օգնություն, մենք տեսել ենք անմեղ քաղաքացիական անձանց սպանությունները։ Իհարկե, դա դեէսկալացիոն գոտի չէ»,-եզրափակել է նա։ Նաուերթը նշել է, որ հենց դրա հետ կապված էլ ԱՄՆ-ը և այլ երկրներ աջակցում են ժնևյան գործընթացին՝ որպես լավագույն տարբերակի։
Նաուերթի խոսքով՝ ԱՄՆ-ը կձգտի հասնել կրակի դադարեցման 30-օրյա ռեժիմի՝ օգնելու տեղի բնակիչներին և ունենալու մարդասիրական օգնության մատակարարման հնարավորություն։
