Համակարգային փոփոխություններ պահանջող ազատամարտիկներն այսօր հերթական հավաքն անցկացրեցին Ազատության հրապարակում:
Իր ելույթում ազատամարտիկ Խաչիկ Ավետիսյանն անդրադարձավ պահեստազորի գնդապետ Վոլոդյա Ավետիսյանի կալանքին․ «Ո՞վ է Վոլոդյան` մարդասպա՞ն, թե՞ բանկեր թալանող, ո՛չ, հասարակ հայ մարդ, որն ըմբոստացավ այս ռեժիմի դեմ՝ տեսնելով իր եղբայր ազատամարտիկների անիրավ կեցությունը, և փորձեց արդարության հասնել այդ ասպարեզում, և ահա կոնցլագերի տերերը որոշեցին փակել նրան՝ այդ ըմբոստին»:
Նա նշեց, որ ազատամարտիկները, շարունակելով Վոլոդյա Ավետիսյանի գործը շատ ավելի լայն ծավալով, հասել են մեծ ժողովրդական ալիքի բարձրացմանը, որն այս կոնցլագերային ռեժիմից կազատի ոչ միայն Վ․ Ավետիսյանին, այլ ողջ հայ ժողովրդին:
Ազատամարտիկն իր ելույթում անդրադարձավ նաև դերասան Վարդան Պետրոսյանի հետ տեղի ուենցածին և ընդգծեց, որ սա ողբերգություն է ոչ միայն զոհված երիտասարդների ընտանիքների, այլև բեռ Վարդան Պետրոսյանի ուսերին, այնպիսի բեռ, որը նա կրելու է իր ողջ կյանքի ընթացքում՝ անկախ նրանից՝ ունի մեղավորություն, թե ոչ․ «Սակայն ի՞նչ կարիք կար կալանավորելու Վարդանին, արդյո՞ք նա այն մարդն էր, որն ուզում էր խուսափել պատասխանատվությունից, ուղղակի անկախ մտավորական Վարդան Պետրոսյանը ուշ թե շուտ պետք է պատժվեր Րաֆֆի Հովհաննիսյանին սատարելու համար»:
Ավետիսյանի խոսքերով՝ այս ռեժիմը ժողովրդի ջանքերով պետք է անցնի պատմության գիրկը: «Իշխանափոխությունը մեր երկրում այլընտրանք չունի»,- եզրափակեց նա:
Մանրամասները՝ տեսանյութում:
