Թուրքիայի վարչապետ Ռեջեփ Թայիփ Էրդողանը և փոխվարչապետ Բյուլենթ Արընչը շաբաթ օրը կարևոր այցով կմեկնեն Դիարբեքիրի մարզ, ինչը թույլ կտա հարթել նրանց միջև ծագած վերջին տարաձայնությունը՝ հաղորդում է Hurriyet daily news-ը:
Էրդողանը Արընչին հրավիրել է մի ինքնաթիռով մեկնել Դիարբեքիր, որտեղ նա կհանդիպի Հյուսիսային Իրաքի քրդական ինքնավարության ղեկավար Մասուդ Բարզանիի հետ:
«Արդարություն և զարգացում» իշխող կուսակցության ղեկավարի տեղակալ Հուսեյն Չելիկը հաստատել է տեղեկատվությունն այն մասին, որ Էրդողանը և Արընչը միասին են մեկնում:
«Վարչապետը և Արընչը միասին մեկնում են Դիարբեքիր, ոչ մի խնդիր չկա: Որոշ մարդիկ փորձում են ենթադրյալ տարաձայնությունից օգուտ քաղել»,- ասել է նա:
Հիշեցնենք, որ ավելի վաղ թուրքական ԶԼՄ-ները տեղեկատվություն էին տարածել այն մասին, որ Թուրքիայի կառավարությունում աճում է տարաձայնությունը Էրդողանի և Արընչի միջև՝ կապված ուսանողական հանրակացարանները տղաների և աղջիկների համար առանձին դարձնելու հարցի հետ:
