«Իրավական առումով ես որոշակի խնդիրներ եմ այստեղ տեսնում, մասնավորապես «Անձնական տվյալների պաշտպանության մասին» օրենքի շրջանակներում, որովհետև վարորդները նախապես տեղյակ չեն լինելու, որ այդ պահին իրենց նկարահանում են և բացի դա՝ մենք ի վերջո չգիտենք նաև թե ով է այդ նկարահանումն իրականացնելու՝ մասնավոր կազմակերպությունը կամ անձն է դա անելու, որը լիազորված է լինելու ՃՈ-ի կողմից, թե հենց ոստիկանությունն է դա անելու՝ իր ռեսուրսներով»,- «Առաջին լրատվական»-ի հետ զրույցում շեշտեց փաստաբան Գևորգ Գյոզալյանը՝ անդրադառնալով փետրվարի 8-ից Հայաստանում գործարկվող շարժական արագաչափերին։
Փաստաբանի կարծիքով, այսուհանդերձ, շրջիկ արագաչափերի անհրաժեշտությունը Երևանում կա, որովհետև հունվարին ՃՏՊ-ների հետևանքով 36 զոհ ունենալը՝ մտահոգիչ հանգամանք է։
«Այսքան արագաչափերի, տույժ-տուգանքների առկայության պարագայում մեր մոտ, ամեն դեպքում, երթևեկությունը չի բարելավվում, ինչը մեծ խնդիր է և այս առումով կարծում եմ, որ անհրաժեշտ է որոշակի քայլեր ձեռնարկել և, եթե նման միջոցը ( նկատի ունի շրջիկ արագաչափերը-խմբագրական), հնարավորություն կտա հավուր պատշաճի կազմակերպել ճանապարհային երթևեկությունը, ապա պետք է դա արվի, բայց իհարկե օրենսդրական երաշխիքների պահպանմամբ»,-շեշտեց Գյոզալյանը։
Նշենք նաև, որ Ճանապարհային ոստիկանությունը շրջիկ արագաչափերի ներդրումը պայմանավորում է 2018թ-ի հունվար ամսին արձանագրված վթարների վերլուծությամբ: Շարժական արագաչափ լուսանկարահանող սարքերը կկիրառվեն Հայաստանի ողջ տարածքում: Ըստ Ճանապարհային ոստիկանության՝ այդ արագաչափերը կկիրառվեն հատկապես այն տեղերում, որտեղ կան սահմանված արագությունը գերազանցելու ռիսկեր: Շաժական արագաչափերի տեղակայման վայրերում նախազգուշացնող ցուցատախտակներ չեն լինելու:
Մանրամասները՝ տեսանյութում։
