Ընդհանուր իրավասության դատարանում ավարտվել է Մ. Մ.-ի (սկզբնատառերը փոխված են) գործի դատավարությունը:
Ըստ դատական ակտի՝ 37-ամյա Մ.Մ.-ի ամուսինը, «մոռանալով», որ ամուսնացած է, 2012 թվականի հունիսին ամուսնության առաջարկ է արել համաքաղաքացի ևս մի կնոջ՝ Գ.-ին: Այս կինը տվել է իր համաձայնությունը և անչափահաս դստեր՝ Հ.-ի ու նորաթուխ ամուսնու հետ ժամանակավոր բնակության է տեղափոխվել վարձակալած բնակարան:
Այդ ընթացքում խաբված կինը՝ Մ. Մ.-ն, ցանկանալով վրեժխնդիր լինել իր ախոյանուհուց, սկսել է հեռախոսազանգերի ու համացանցի միջոցով պարբերաբար արժանապատվությունը նվաստացնող տեղեկություններ հրապարակել Գ.-ի ու նրա անչափահաս դուստր Հ.-ի վերաբերյալ:
2013 թվականի հունվարին Գ.-ն ու իր ամուսին կոչվածը որոշել են այլևս վարձով չապրել և տեղափոխվել են Գ.-ի բնակարան, որտեղ ապրում էր Գ.-ի մայրը:
Մի քանի օր այդ բնակարանում ապրելուց հետո բազմակին տղամարդը պատճառաբանել է, թե ծնողները բացակայելու են քաղաքից, տեղափոխվել է ծնողների բնակարան և այնտեղ առոք-փառոք ապրել օրինական կնոջ՝ Մ.Մ.-ի ու երկու երեխաների հետ՝ չդադարեցնելով նաև շփումը Գ.-ի հետ:
Ընտանեկան կրքերը շարունակել են բորբոքված մնալ, ու Մ. Մ.-ն շարունակել է պարբերաբար նվաստացնել Գ.-ի անչափահաս աղջկա արժանապատվությունը:
2013 թվականի ապրիլի 30-ին նա «Օդնոկլասնիկի» կայքի միջոցով արժանապատվությունը նվաստացնող հաղորդագրություններ է ուղարկել աղջկա ընկերներին:
Այդ կերպ, ըստ դատական ակտի, Մ. Մ.-ն անզգուշությամբ անչափահաս աղջկան հասցրել է ինքնասպանության փորձի:
Աղջիկը նույն օրը, ժամը 19-ի սահմաններում փորձել է ինքնասպան լինել՝ տանը սայրով իր ձախ նախաբազկի վրա կտրվածքներ կատարելով: Դրանից աղջիկը կորցրել է գիտակցությունը:
Նրան հայտնաբերել է տատիկը և ցուցաբերել անհրաժեշտ օգնություն:
Մ.Մ.-ին մեղադրանք էր առաջադրվել ՀՀ քրեական օրենսգրքի 110 հոդվածի 1-ին մասով:
Մինչև գործի դատաքննության ավարտը ամբաստանյալ Մ. Մ.-ն դիմում է ներկայացրել դատարան՝ խնդրելով իր նկատմամբ համաներում կիրառել:
Մեղադրող դատախազը և տուժողի օրինական ներկայացուցիչն ու ներկայացուցիչը չեն առարկել:
Ընդհանուր իրավասության դատարանը համաներման կիրառմամբ քրեական գործի վարույթը կարճել է, երկու երեխաների մայր Մ. Մ.-ի նկատմամբ քրեական հետապնդումը՝ դադարեցրել:
