Մերսիսայդի քրիստոնեական դպրոցում որոշել են հեռացնել աղջիկների զուգարանի պատերից մեկը, ինչը մեծ աղմուկի պատճառ է դարձել: Հիմա զուգարանի խցիկները երևում են հենց միջանցքից, ինչն անհարմար վիճակի մեջ է դնում երեխաներին:
Դպրոցն իր որոշումը բացատրում է աշակերտներին վերահսկելու անհրաժեշտությամբ. տնօրինության կարծիքով հենց զուգարանում են աղջիկները խմում, ծխում, դասերից թաքնվում և համադասարանցիներին ծաղրում: Լուրեր են պտտվում, որ մյուս շաբաթ նաև տղաների զուգարանի պատն են քանդելու: Ծնողները չեն գնահատել տարօրինակ մանկավարժական մոտեցումը և, ի նշան բողոքի, երեխաներին չեն ուղարկում դպրոց:
Աշակերտուհիների ծնողներն ընդունում են, որ երեխաներին դպրոց չթողնելը լավ մեթոդ չէ, քանի որ այս տարի նրանցից ոմանք քննություններ ունեն: Սակայն, այնուամենայնիվ, այլ ելք նրանք չեն տեսնում. դպրոցի տնօրինությունը հրաժարվում է հանդիպել նրանց հետ:
Իրավիճակը սոցցանցերում քննարկելով՝ աղջիկների ծնողները այլ մեթոդներ են առաջարկում ծխելու դեմ կամ դասերից բացակայելու դեմ պայքարի, իսկ ոմանք նշում են, որ պատի բացակայությունը չի փրկի երեխաներին ագրեսիայից:
«Իմ աղջկան ծեծել էին դասարանում, ճաշարանում և փողոցում, այնպես որ զուգարանի պատը քանդելը հիմարություն է»,- գրել է ծնողներից մեկը:
Վրդովված ծնողները հուսով են, որ այս շաբաթ իրավիճակը կպարզվի. իրենք հանդիպելու են ավագ ուսուցչի հետ:
