«Առաջին լրատվական»-ի տեղեկություններով՝ ալավերդցի քրեական հեղինակություն Ալավերդցի Վահագի՝ Վահագն Աբգարյանի գործը առաջիկայում դառնալու է իրավապահ երկու կառույցների բախման պատճառ։ Քանի որ շատ հավանական է, որ գործը քննչական կոմիտեից տեղափոխվի Հատուկ քննչական ծառայություն, քանի որ նույն տեղեկությունների համաձայն՝ Վահագն Աբգարյանը մեղադրվում է նաև պաշտոնատար անձին կաշառք տալու մեջ։ Սա որպես առանձին մեղադրանք, հոդված դրված չէ մեղադրանքի հիմքում, սակայն մեղադրանքում հստակ նշված է պաշտոնատար անձին կաշառք տալու փաստը։ Իսկ երբ արդեն խոսք է գնում պաշտոնատար անձի մասին, գործը պետք է քննի ՀՔԾ-ն։
Նշենք, որ Ալավերդցի Վահագի մեղադրանքի հիմքում դրված է ԱԱԾ-ի կողմից իրականացված երկու գաղտնալսում և մեկ ցուցմունք, որը վերցվել է Վահագն Աբգարյանի ձերբակալությունից հետո։
Նշենք, որ գործը բացահայտվել էր Քննչական կոմիտեի և ԱԱԾ-ի համատեղ աշխատանքի արդյունքում։ Իսկ հիմա շատ հավանական է, որ գործը տեղափոխվի ՀՔԾ։
ՀԻշեցնենք, որ Վահագն Աբգարյանին մեղադրանք է առաջադրվել՝ հանցավոր համագործակցություն ստեղծելու և ղեկավարելու (ՀՀ քրեական օրենսգրքի 223-րդ հոդվածի 1-ին մաս), Կ. Փիրուզյանի սպանությունը կազմակերպելու (ՀՀ քրեական օրենսգրքի 38-104-րդ հոդվածի 2-րդ մասի 7-րդ և 8-րդ կետերով) և Ռ. Մոսինյանի սպանության նախապատրաստությունը կազմակերպելու համար (ՀՀ քրեական օրենսգրքի 38-35-104-րդ հոդվածի 2-րդ մասի 7-րդ և 8-րդ կետերով)։
Նրանից բացի, այլ անձանց ևս մեղադրանք է առաջադրվել։
