«2018 թվականին մենք կշարունակենք և կավարտենք համայնքների խոշորացման ծրագիրը»,-այսօր համայնքների տնտեսական զարգացման խորհրդատուների հետ հանդիպման ժամանակ ասաց տարածքային կառավարման և զարգացման նախարարի տեղակալ Վարազդատ Կարապետյանը։
Նա նշեց, որ համայնքների ղեկավարները, տնտեսական զարգացման ծրագրերի պատասխանատուները բավական լուրջ ծրագրեր են ներկայացրել, որոնց համար ռեսուրսներ հայթհայթելուց հետո դրանք կյանքի կկոչվեն։
«Միջազգային կազմակերպությունները, երբ հայտարարում են միջազգային ծրագրերի տենդերներ, միայն երկու-երեք տոկոսն է, որ համայնքները մասնակցում են այդ տենդերներին։ Այսինքն ֆինանսներ կա, ուղակի համայնքները գրագետ ներկայանալու խնդիր ունեն։ Դրա համար էլ մենք ներդրեցինք տնտեսական զարգացման պատասխանատուի ինստիտուտը, որը ներքևից վերև պատվեր կներկայացնի նաև պետական կառավարմանը, թե ինչպիսի ծրագրեր առաջարկել»,-ասաց Կարապետյանը՝ հավելելով, որ կառավարությունը ևս նախատեսում է ֆինանսավորել սոցիալական և տնտեսական ծրագրերը համապատասխանաբար 40 և 60 տոկոսի չափով։
Քննարկմանը ներկա Աշտարակի քաղաքապետի խորհրդական, մարզի տնտեսական զարգացման ծրագրի պատասխանատու Արթուր Ոսկանյանը մեզ հետ զրույցում ասաց, որ երկրի և մարզի մակարդակով շատ դժվար է ներդրումային ծրագիր մշակել և կյանքի կոչել, քանի որ վստահության պակաս կա։ Ոսկանյանը նշեց, որ անցած տարվանից Աշտարակում զարգացնում են հյուրընկալության ոլորտը, որի արդյունքները նկատելի կլինեն այս տարի արդեն։
Առավել մանրամասն՝ տեսանյութում
