Քաղաքագետ Հրանտ Մելիք-Շահնազարյանի կարծիքով՝ հունվարի երկրորդ կեսին սպասվող Մամեդյարով-Նալբանդյան հանդիպումից մեծ սպասելիքներ չպետք է ունենալ, դրա մասին բացահայտ խոսում է նաև ՀՀ արտգործնախարարությունը. «Գուցե ինչ-որ ժամանակահատվածի համար սահմանային լարվածությունը նվազում է՝ մեկ ամսով կամ մեկ շաբաթով։ Ժնևյան հանդիպումից հետո մենք տեսանք, որ որոշ ժամանակ անդորր էր։ Ցավոք սրտի տարեսկզբին զոհ ունեցանք, բայց այս լարվածությունը համեմատելի չէ նախորդ տարվա այս ժամանակահատվածի լարվածության հետ»,-«Առաջին լրատվական»-ի հետ զրույցում ասաց նա։
Քաղաքագետը նշում է՝ միանշանակ չէ, որ արտգործնախարարների հանդիպման արդյունքում հնարավոր է ձեռք բերել լարվածությունը թուլացնելու պայմանավորվածություն.«Անգամ նախագահների մակարդակով ձեռք բերված պայմանավորվածությունները մինչև վերջ չեն գործում»,-ընդգծեց մեր զրուցակիցը։
Հրանտ Մելիք-Շահնազարյանը նշում է՝ եթե ապրիլին մենք ունենանք առաջին դեմքի փոփոխություն՝ հնարավոր է մոտեցումների փոփոխություն լինի, բայց դա գլոբալ մարտավարության փոփոխություն չի լինի. «Ակնհայտ է, որ որդեգրված կուրսը ինչ-որ խնդիրներ մեզ համար լուծում է, համենայնդեպս խաղաղության քիչ թե շատ ընդունելի մակարդակ կա։ Հնարավորություն կա Արցախի բոլոր տարածքները յուրացնելու, շինարարական աշխատանքներ տանելու, բնակեցնելու հետ կապված։ Դեմ չեմ, եթե բանակցային գործընթացը շարունակվի, թեկուզ հարյուր տարի, եթե դա հնարավորություն է տալու մեզ ավելի ուժեղացնել դիրքերը կոնկրետ բանակցվող առարկայի դաշտում»։
Առաջիկայում Ադրբեջանում սպասվող ընտրությունները հնարավոր է անդրադարձ ունենան նաև ղարաբաղյան ճակատում։ Հրանտ Մելիք-Շահնազարյանի կարծիքով՝ ամենամեծ սպառնալիքը հենց այդ ընտրություններն են.«Գիտենք, որ այնտեղ սոցիալական դժգոհությունը բավականին մեծ է, կա նաև ներիշխանական լարվածություն։ Գիտենք նաև Ալիևի ոճը՝ ուշադրություն շեղելու ու կեղծ օրակարգ ստեղծելու մարտավարությունը։ Հայաստանում և Ռուսաստանում տեղի ունեցող քաղաքական գործընթացներում՝ ամեն ինչ պարզ է, իսկ Ադրբեջանում ընտրությունները առիթ կարող են լինել»։
Հարցազրույցն ամբողջությամբ՝ մեր տեսանյութում
