Երեկ խորհրդարանում մեկնարկած Հայաստան-ԵՄ խորհրդարանական համագործակցության կոմիտեի 17-րդ նիստի ժամանակ Հայաստանի ԱԳ փոխնախարար Կարեն Նազարյանը հայտարարեց, որ Հայաստան-ԵՄ ընդլայնված և համապարփակ համաձայնագրի վավերացումը նախատեսվում է հաջորդ տարվա գարնանը: Պարզվում է՝ այս հարցը հետաքրքրում է նաև Հայաստանում ԵՄ պատվիրակության ղեկավար, դեսպան Պյոտր Սվիտալսկուն, քանի որ կոմիտեի հայաստանյան կողմի համանախագահ Արմեն Աշոտյանը փոխնախարարի հայտարարությունից հետո ուրախությամբ նշեց, որ դեսպան Սվիտալսկին իրենից էր հետաքրքրվում, թե երբ է նախատեսված համաձայնագրի վավերացումը, և լավ է, որ կառավարության ներկայացուցիչը ինքը կոնկրետ ժամկետ հայտնեց: Դեսպան Սվիտալսկին իր այս հետաքրքրվածությունը բացատրեց այն հանգամանքով, որ միայն համաձայնագրի վավերացումից հետո հնարավոր կլինի իրականացնել այն ծրագրերը, որոնք նախատեսված են այդ համաձայնագրով: Համաձայնագիրը պետք է վավերացնի ոչ միայն Հայաստանի խորհրդարանը, այլ ԵՄ անդամ 27 երկրների ազգային խորհրդարանները և Եվրախորհրդարանը: Քանի որ սա Հայաստան-ԵՄ խորհրդարանական համագործակցության կոմիտեի առաջին նիստն էր Հայաստան-ԵՄ համապարփակ և ընդլայնված համագործացության համաձայնագրի ստորագրումից հետո, բնական է, որ բոլոր ելույթները նվիրված էին հենց այդ համաձայնագրի իրականացմանը:
Հայաստան-ԵՄ խորհրդարանական համագործակցության կոմիտեի համանախագահ Սաջադ Քարիմը ասում է, որ այս համաձայնագիրը մեծ հնարավորություն է, որպեսզի Հայաստանի քաղաքացիները կարողանան ստանալ ԵՄ մուտքի ազատ արտոնագիր, որը կդյուրացնի Հայաստանի քաղաքացիների ազատ տեղաշարժը ԵՄ անդամ երկրներում: Նա շեշտում է, որ համաձայնագիրը բացառիկ հնարավորություններ է ստեղծում բիզնեսի, գիտության, տեխնոլոգիաների ոլորտում ներգրավված անձանց մասնակցելու ԵՄ ֆինանսավորմամբ գործող ծրագրերին: Բրիտանացի պատգամավորը հատուկ ընդգծում է, որ համաձայնագրի ստորագրումից հետո ԵՄ-ն էականորեն մեծացնելու է Հայաստանին տրամադրվող ֆինանսական օժանդակությունը: Եթե 2014-17թթ. համար այն եղել է 118․5 մլն եվրոյի չափով, ապա 2018-20թթ. համար նախատեսված է 180 մլն եվրո: Բայց Հայաստանն էլ իր կողմից պետք է իրականացնի համաձայնագրով ստանձնած իր պարտավորությունները։ Իսկ եվրոպական կառույցները այդ ֆինանսավորման դիմաց ակնկալում են, որ Հայաստանը իրական պայքար կծավալի կոռուպցիայի դեմ, Հայաստանում պաշտպանված կլինեն մարդու իրավունքներն ու ազատությունները, կապահովի լրատվամիջոցների ազատ արտահայտման իրավունքը, կպաշտպանվեն փոքրամասնությունների իրավունքները:
Այս նույն խնդիրների մասին խոսեց նաև դեսպան Սվիտալսկին, որը ևս համոզված է, որ համապարփակ և ընդլայնված համաձայնագիրը լայն հնարավորություններ է ստեղծում զարգացնելու համագործակցությունը ամենատարբեր ոլորտներում: Որպես առաջին քայլ նա հիշեցրեց, որ Հայաստանը նախաստորագրել է Միասնական ավիացիոն տարածքի համաձայնագիրը: Հայաստանի քաղաքացիները արդեն 2016թ. հնարավորություն ունեն օգտվելու ԵՄ ֆինանսավորմամբ գործող «Հորիզոն 2020» և «Կոսմե» ծրագրին: Սվիտալսկին ևս շեշտում է, որ ԵՄ-ն 20-25 տոկոսով մեծացնելու է Հայաստանին տրամադրվող ֆինանսական օժանդակությունը, որը նշանակում է, որ ԵՄ-ն դինամիկ զարգացնում է հարաբերությունները Հայաստանի հետ: Կարևորելով ժողովրդավարական կառույցների զարգացման, մարդու իրավունքների պաշտպանության, օտարերկրյա ներդրումների խրախուսման և համապատասխան բիզնես միջավայրի ապահովման հարցում Հայաստանի կողմից ստանձնած հանձնառությունների կատարման կարևորությունը, դեսպան Սվիտալսկին հայտարարեց. «Համարեք, որ այդ բարեփոխումների իրականացման դիվանագիտական օժանդակությունը առկա է»:
Հայկական կողմը հայտարարում է, որ Հայաստանը պատրաստ է կատարել այդ հանձնառությունները: ԱԺ արտաքին հարաբերությունների հանձնաժողովի նախագահ Արմեն Աշոտյանը վստահեցնում է, որ ավելին ավելիի դիմաց սկզբունքին հավատարին լինելը, Հայաստանի համար ոչ այնքան հավելյալ ֆինանսական աջակցություն ստանալու միջոց է: Ըստ Աշոտյանի՝ Հայաստանը շահագրգռված է նաև քաղաքական առաջընթացի ապահովմամբ, հընթացս ասելով, որ ԵՄ-ն արդեն արձանագրել է այդ հաջողությունները: Մնում է, որ հայ հասարակությունն էլ արձանագրի այդ հաջողությունները:
Հայաստանի ԱԳ փոխնախարար Կարեն Նազարյանը ավելի շատ կարևորում է Հայաստանի քաղաքացիների համար ԵՄ երկրներ այցելության համար վիզային ռեժիմի վերցման խնդիրը: «Վիզաների ազատականացումը կնպաստի մեր հասարակությունների մերձեցմանը»,- ասում է Նազարյանը, կոչ անելով նիստին ներկա Եվրախորհրդարանի պատգամավորներին օգտագործել խորհրդարանական դիվանագիտության լծակները և օժանդակել վիզաների ազատականացման համաձայնագրի կնքման արագացմանը:
Այսօր կոմիտեի նիստը շարունակվելու է. հայ և եվրոպացի պատգամավորները քննարկելու են նաև Արցախի հակամարտության կարգավորման հնարավորությունները:
