«Հայաստան-ԵՄ համաձայնագրի կնքումը իմպուլս հանդիսացավ այն քաղաքական ուժերի ակտիվացման համար, որոնք ընդհանրապես դեմ էին Հայաստան-Ռուսաստան ռազմավարական գործընկերությանը և Հայաստանի մասնակցությանը ԵԱՏՄ-ին ու ՀԱՊԿ-ին»,- «Առաջին լրատվական»-ի հետ զրույցում նման տեսակետ հայտնեց ԵՊՀ Միջազգային հարաբերությունների ֆակուլտետի Քաղաքական ինստիտուտների և գործընթացների ամբիոնի վարիչ Գարիկ Քեռյանը։
Նրա խոսքով՝ մեկ օրվա խնդիր չէ անվտանգային մի համակարգից դուրս գալն ու մյուսին միանալը. «Ինձ թվում է՝ ներկա պահին այդպիսի գործընթաց սկսելն այդքան էլ հարմար չէ։ Մենք ունենք Ղարաբաղյան հակամարտություն, կա Ռուսաստան, որն անում է ամեն ինչ, որ Ադրբեջանն էլ անցնի իր ազդեցության գոտի։ Երբ մենք լիովին չենք մարսել ՀՀ-ԵՄ համաձայնագրի բացասական արձագանքները Մոսկվայից, ես շատ վտանգավոր եմ համարում այս փուլում նման գործընթաց սկսելը։ Գուցե կա այդպիսի պահ, հայ-թուրքական հարաբերությունների կարգավորումից հետո կարող է հնարավոր լինի նման քայլ կատարել։ Բայց ներկա պահին մենք նոր-նոր քայլ ենք արել բալանսավորված քաղաքականության ճանապարհին, իրավիճակը նման նախաձեռնություններով բարդացնելը ճիշտ չէ»։
Մեր զրուցակիցը նշում է, որ և՛ Եվրամիության, և՛ ՆԱՏՕ-ի անդամ դառնալը բարդ և երկարատև գործընթաց է. «Այդպես միամտաբար մտածել, որ նման Շրջանակային համաձայնագիր ստորագրելուց հետո կարելի է հոպ թռիչք անել ու հայտնվել ԵՄ-ի կամ ՆԱՏՕ-ի կազմում, ծիծաղելի է և քաղաքական կարճատես մոտեցում է»։
Հարցազրույցն ամբողջությամբ՝ տեսանյութում:
