Մինսկում ավարտվել է Հավաքական անվտանգության պայմանագրի կազմակերպության (ՀԱՊԿ) հավաքական անվտանգության խորհրդի նստաշրջանը: Նախագահի կայքէջի հաղորդմամբ՝ նստաշրջանի շրջանակներում ընդունվել են նաև քաղաքական հայտարարություններ, այդ թվում` Հայաստանի նախաձեռնությամբ ներկայացված «ԼՂ հիմնախնդրի կարգավորման հարցում ԵԱՀԿ Մինսկի խմբի համանախագահող երկրների միջնորդական ջանքերին աջակցելու» վերաբերյալ հայտարարությունը, որում ՀԱՊԿ անդամ երկրների նախագահները ևս մեկ անգամ վերահաստատել են իրենց աջակցությունը ՄԽ համանախագահողների գործունեությանը, ինչպես նաև հիմնահարցի կարգավորման հայտնի երեք` ազգերի ինքնորոշման իրավունքի, ուժի և ուժի սպառնալիքի չկիրառման և տարածքային ամբողջականության սկզբունքներին:
Հայաստանի իշխանությունների այսօրվա նախաձեռնությունը խիստ հաշվենկատ և դիվանագիտական տեսանկյունից արդյունավետ է: ԼՂ հարցում Եվրամիության հստակ դիրքորոշումը շրջանակային համաձայնագրով ֆորմալիզացնելուց հետո Հայաստանը հետամուտ եղավ, որ նույն տեսակետը հնչի ՀԱՊԿ անդամ երկրների համատեղ պաշտոնական հայտարարության մեջ: Մի կողմից խիստ սկզբունքային է, որ տարածաշրջանում ազդեցություն ունեցող բոլոր աշխարհաքաղաքական կենտրոններն իրենց համերաշխությունն են հայտնում Մինսկի խմբի համանախագահության ձևաչափին, մյուս կողմից` նման փաստաթղթերով լեգիտիմացվում է Արցախի ինքնորոշման իրավունքի ճանաչման հեռանկարը:
Հայաստանի նախագահի այսօրվա նախաձեռնությունը, առաջին հերթին, ուղղված է Ռուսաստանի դիրքորոշման վերահաստատմանը, սակայն խիստ սկզբունքային է այն հանգամանքը, որ Երևանին այսօր հաջողվել է իր հայտարարության տակ ապահովել նաև Իլհամ Ալիևի լոբբիստներ Նուրսուլթան Նազարբաևի և Ալեքսանդր Լուկաշենկոյի ստորագրությունները:
Սակայն Հայաստանի դիվանագիտական ջանքերի ակտիվացումը եվրոպական և եվրասիական ուղղություններով կարևոր է ոչ միայն կարգավորման հեռանկարի, այլ նաև` պատերազմի կանխման տեսանկյունից: Երբ Բաքուն Բրյուսելում փորձում էր կանխել Հայաստան-ԵՄ շրջանակային համաձայնագրի ստորագրումը կամ Արևելյան գործընկերության գագաթնաժողովի բանաձևում թելադրել ԼՂ հարցի լուծման իր ձևակերպումը, դա անում էր պատերազմ սանձազերծելու իր մտադրությունը լեգիտիմացնելու համար:
Երևանը նոյեմբերի 24-ին Ադրբեջանի ճանապարհը փակեց Բրյուսելում, այսօր Մինսկում` ՀԱՊԿ գագաթնաժողովում: Այս քայլերով Հայաստանը, ըստ էության, Ադրբեջանի պատերազմ սանձազերծելու մտադրությունը զրկեց միջազգային լեգիտիմությունից: Իհարկե, ասվածը չի երաշխավորում, որ Ադրբեջանը միանշանակ հրաժարվելու է պատերազմելու մտադրությունից, մանավանդ` Բաքվում այսօր կայացած ադրբեջանա-թուրքա-պակիստանյան բանակցությունների ֆոնին:
Այնուամենայնիվ, պատերազմի հնարավոր սանձազերծումն ավելի է խորացնելու Ադրբեջանի միջազգային մեկուսացումը կամ իրական է դարձնելու Արցախի միջազգային ճանաչման հեռանկարը, որովհետև Երևանը կարող է ակնկալել ԱՄՆ-ի ու ԵՄ-ի քաղաքական և ՀԱՊԿ-ի դաշինքային, գործընկերային աջակցությունը: Համենայնդեպս, պաշտոնական փաստաթղթերի մակարդակում Հայաստանը ստացել է աջակցության երաշխիքներ:
