Այս տարի Մեծ հայրենադարձության 70-ամյակն է և հարց է ծագում, թե ինչու չի նշվում այդ տարեդարձը։ Այդ մասին «Առաջին լրատվական»-ի հետ զրույցում նշեց «Ազգ» թերթի գլխավոր խմբագիր Հակոբ Ավետիքյանը։
Նրա խոսքերով՝ հայրենադարձությունը սկսվել է 1928 թվականից մինչև 1964 թվականը. «Վերջինը եղել է Սիրիայի Քամիշլիի շրջանից, հատկապես քրդախոս հայերից։ Ինչո՞ւ չի նշվում այդ տարեդարձը, որովհետև դա շատ մեծ շարժում էր։ Մեծ հայրենադարձությանը 120-130 հազար մարդ է եկել Հայաստան։ Դրան պետք է գումարենք նաև Վրաստանի որոշ շրջաններից, Ռուսաստանից, Ղարաբաղից և այլ վայրերից շարունակական, ինքնաբուխ ներգաղթի շարժումը։ Արժեր, որ մենք ևս մեկ անգամ գիտականորեն քննեինք այդ շարժումը, նաև հանդիսություններով։ Պետք է ուսումնասիրել այդ շարժման թերի կողմերը, նպատակները, ինչու Մոսկվան թույլ տվեց մեծ հայրենադարձությունը և այլն»,- ասաց Ավետիքյանը։
Նա ընդգծեց, որ սա ավելի լրջություն կտար և կարևոր մեսիջներ կտար մեր հանրությանը։
Անդրադառնալով Սփյուռքի նախարար Հրանուշ Հակոբյանի հայտարարությանը, որ իրենք հայրենադարձության ուղղությամբ քայլեր են մշակում, Հակոբ Ավետիքյանն ասաց. «Իմ տեղեկություններով՝ Սփյուռքի նախարարության «Վերադարձ Հայաստան» նախագիծը արդեն վերջացրել են և պետք է ներկայացնեն հանրությանը։ Սփյուռքի նախարարությունը 8 տարի գոյություն ունի․ շատ չի՞ այդ նախագիծը պատրաստելու համար։ Մյուս կողմից կա մի լավ երևույթ, որն անկախ Սփյուռքի նախարարությունից է կատարվում։ Մի քանի երիտասարդներ արդեն որքան ժամանակ, առանց թմբուկի ու շչակների, վերադարձի ծրագիր են իրականացնում, արդեն որոշակի կապեր են ստեղծել, կարողանում են շարժում ստեղծել։ Նպատակն է երիտասարդ մասնագետների ներգրավել Հայաստան, բերել Հայաստան, թեկուզ այստեղ մշտապես չապրեն։ Դա լավ օրինակ է հետևելու, և կարող է դրանից երկիրը օգուտ ստանալ և՛ ազգային, և՛ տնտեսական, և՛ մտքի կուտակման իմաստներով»։
Իսկ թե ինչու չեն նշում Մեծ հայրենադարձության 70-ամյակը, Ավետիքյանն իր բացատրությունն ունի. «Որովհետև եթե նշեն, հասարակությունը կասի՝ այսքան արտագաղթ է տեղի ունենում, իսկ դուք հայրենադարձության մասի՞ն եք խոսում։ Սա ամոթալի կլիներ իշխանությունների համար»։
Ամբողջությամբ՝ տեսանյութում:
