ԱՄՆ նախագահ Դոնալդ Թրամփը պատմել է, որ հանդիպում է ունեցել Վիրջինյան կղզիների նախագահի հետ: Բանն այն է, որ այնտեղ ըստ էության նախագահ, որպես այդպիսին, գոյություն չունի: ԱՄՆ Վիրջինյան կղզիները համարվում են ԱՄՆ տարածք, և այնտեղ կա միայն նահանգապետ:
«Ասեմ ձեզ՝ ես մեկնել եմ Տեխասից, Ֆլորիդայից, Լուիզիանայից, մեկնել Պուերտո Ռիկո և հանդիպել եմ Վիրջինյան կղզիների նախագահին,- Վաշինգտոնում անցկացվող Values Voter Summit համաժողովին ելույթ ունենալով՝ ասել է Սպիտակ տան ղեկավարը:
«Վիրջինյան կղզիները և նրանց ղեկավարը անհավատալի մարդիկ են»,- ավանդաբար հավելել է նա:
ԱՄՆ առաջնորդը չի նկատել իր սխալը և շարունակել է պատմել, թե ինչպես են կղզիների բնակիչները հաղթահարել «Մարիա» և «Իրմա» փոթորիկների հետևանքները:
Նրա ելույթի պաշտոնական վերծանման մեջ «նախագահ» բառը, այնուամենայնիվ, փոխարինել են «նահանգապետ» բառով:
