«Խաչատրյան Սուրիկը ունեցել է աշխատելու շատ ժամանակ ու հնարավորություն: Թե որքանով է կարողացել իրեն արդարացնել, գնահատականը տրված է՝ նախկին մարզպետ»,- «Առաջին լրատվական»-ի հետ զրույցում ասաց Գորիսի քաղաքապետի ժամանակավոր պաշտոնակատար Առուշ Առուշանյանը՝ անդրադառնալով Սյունիիք նախկին մարզպետ Սուրիկ Խաչատրյանի՝ իր վերաբերյալ դիտարկումներին:
Հիշեցնենք, որ նախօրեին Սյունիքի նախկին մարզպետ Սուրիկ Խաչատրյանը, անդրադառնալով քաղաքապետի պաշտոնում Առուշանյանի ժամանակավոր նշանակմանը և առաջիկա առաջադրմանը, նախ հայտարարել էր, որ ոչ մի պարագայում չի պաշտպանի նրա թեկնածությունը, ապա Առուշանյանի նշանակումը համեմատել էր սովետի տարիների մի նշանակման հետ, երբ որ «Միկրոշարժիչ» գործարանի բանվորին 86 թվականին նշանակել էին քաղխորհրդի նախագահ:
«Ինչ վերաբերում է իմ աշխատանքին, ապագա ծրագրերին և հանրության վստահությանը, պետք է ասեմ, որ հպարտ եմ նրանով, որ իմ համաքաղաքացիները հենց ինձ են վստահում և ինձ հետ են կապում մեր համայնքի զարգացման հեռանկարները: Սա է մեր թիմի համար ամենամեծ գնահատականը: Ես աշխատելու եմ բոլորի համար, լինելու եմ համայնքապետ բոլորի համար, իսկ թե ինչպիսի արդյունավետություն կունենա մեր աշխատանքը՝ ցույց կտա մոտակա ժամանակը»,- մեզ հետ զրույցում հավելեց Առուշանյանը։
Նշենք, որ Առուշանյանի և Սուրիկ Խաչատրյանի հարաբերությունները վաղուց լարված են: Երեք տարի առաջ Խաչատրյանի մերձակա շրջապատի անձանցից մեկը ծեծի էր ենթարկել Առուշանյանին պատկանող խանութի աշխատակիցներից մեկին, և Առուշանյանը ոստիկանությունում տվել էր Դերենիկ Ղևոնդյանի անունը՝ ասելով, որ նա ծեծի է ենթարկել աշխատողներից մեկին: Դերենիկ Ղևոնդյանը Սյունիքի նախկին մարզպետ Սուրիկ Խաչատրյանի վարորդի որդին է:
Առուշ Առուշանյանը, սակայն, մեզ հետ զրույցում հորդորեց անցյալը չփորփրել։ «Ծեծկռտուքի միջադեպ Սուրիկ Խաչատրյանի հե՞տ… Բոլորը գիտեն, ես միակ գործարարը չեմ, ով նախկին մարզպետի հետ, մեղմ ասած, անհամաձայնություն է ունեցել: Կարծում եմ՝ անցյալը փորփրելու կարիք չկա. կարևորն այն է, որ այսօր արդեն մեր համայնքում գործարարության զարգացման ու ներդրումների համար առողջ և արդար, բարիդրացիական մթնոլորտ է ստեղծված»,- ասաց քաղաքապետի ժամանակավոր պաշտոնակատարը:
Նշենք, որ Գորիսում նոյեմբերի 5-ին կայանալիք արտահերթ ընտրություններում Առուշ Առուշանյանը առաջադրվելու է ՀՀԿ-ի կողմից և, ըստ ամենայնի, լինելու է միակ թեկնածուն։ Առուշանյանից հետաքրքրվեցինք՝ ինչպե՞ս եք գնահատում Ձեր շանսերը, մրցակիցներ կունենա՞ք, թե՞ Ձեզ համարում եք արդեն հաղթած թեկնածու։ «ԱԺ ընտրությոններին ստացել եմ շուրջ 7000 քվե՝ արժանանալով գորիսեցիների վստահությանը: Կարող եմ ասել, որ համայնքի ղեկավարի պաշտոնակատար նշանակվելուց հետո Գորիսում շոշափելի փոփոխություններ կան: Մեր ամենօրյա աշխատանքի արդյունքում մեր համաքաղաքացիների վստահությունն ու հավատը ապագայի նկատմամբ ավելի են մեծանում: Վստահ եմ, որ առաջիկա ընտրություններին առավել լավ արդյունքներ են լինելու»,- եզրափակեց Առուշ Առուշանյանը։
