Տասնյակ հազարավոր մարդիկ հավաքվել են Բարսելոնայի կենտրոնում՝ բողոք արտահայտելու անկախության մասին հայտարարելու Կատալոնիայի առաջնորդների պլանների դեմ։ Այս շաբաթ Կատալոնիայի ղեկավար Կառլես Պուչդեմոնը Մադրիդին բանակցություններ էր առաջարկել։ Իսպանիայի վարչապետ Մարիանո Ռախոյը հայտարարել էր, որ սպառնալիքների ֆոնին խոսելու ոչինչ չկա, և անձամբ էր սպառնացել ապստամբ իշխանությունների արձակմամբ. նման հնարավորություն ամրագրված է սահմանադրությամբ։
Հավաքվածներն իրենց ձեռքերում պահել են Իսպանիայի և Կատալոնիայի դրոշները և վանկարկում են. «Փառք Իսպանիային», «Կատալոնիան Իսպանիան է»։ Կազմակերպիչները կիրակնօրյա ակցիան անվանել են «լուռ մեծամասնության» հանրահավաք, որը դեմ է հանրաքվեին, փոխանցում է BBC-ն։
Կատալոնիայի խորհրդարանը մտադիր է երեքշաբթի քննարկել իրավիճակը, և, ինչպես կարծում են ոմանք՝ հայտարարել անկախության մասին։
