ՀՀ արտգործնախարար Էդվարդ Նալբանդյանը Հայաստանի եւ Եվրամիության հարաբերություններում կարեւորում է մարդկանց միջև շփումները: Արտգործնախարարն այս մասին ասաց Եվրոպական հանձնաժողովի հարեւանության եւ ընդլայնման հարցերով հանձնակատար Յոհաննես Հանի հետ համատեղ ասուլիսի ընթացքում: Նախարարն ընդգծեց, որ վիզայի ռեժիմի ազատականացումը հանդիսանում է շարժունակության և մարդկանց միջև շփումների խորացման կարեւորագույն բաղադրիչներից մեկը, ինչն ամրագրված է Վիլնյուսի և Ռիգայի հռչակագրերում:
«Մեր օրակարգը համալրվում է նոր բովանդակությամբ, մասնավորապես՝ տրանսեվրոպական տրանսպորտային ցանցի ընդլայնմամբ, առաջարկներ կան Արեւելյան գործընկերության երկրներում ռոումինգի սակագների հարմոնիզացիայի նվազեցման, ինչպես նաև՝ գործընկերային երկրներում տեղական արժույթով փոքր և միջին ձեռնարկությունների զարգացման ֆինանսավորման վերաբերյալ: Համոզված եմ, որ մեր փոխգործակցությունը կհամալրվի նաև այլ ծրագրերով»,- նշեց նա:
Էդվարդ Նալբանդյանի խոսքով՝ Հայաստանն ու Եվրամիությունը համագործակցում են ամենատարբեր ոլորտներում, ինչպես օրինակ՝ աջակցություն գյուղական համայնքներին, Հայաստան-Վրաստան սահմանային անցակետերի արդիականացման գործընթացին և այլն:
Հոկտեմբերի 2-ին ՀՀ արտգործնախարար Էդվարդ Նալբանդյանի հրավերով Հայաստան է ժամանել Եվրոպական հանձնաժողովի հարևանության եւ ընդլայնման հարցերով հանձնակատար Յոհանես Հանը: Այցի շրջանակում նախատեսված են հանդիպումներ Հայաստանի բարձրաստիճան պաշտոնյաների հետ:
