Ֆրանսիայում դատաքննիչները որոշել են փակել երկրի նախկին նախագահ Նիկոլա Սարկոզիի դեմ հարուցված գործը, ով մեղադրվում էր L՛Oreal ընկերության սեփականատիրուհի Լիլիան Բետանկուրի վստահությունը չարաշահելու մեջ՝ հաղորդում է Sud Ouest ֆրանսիական պարբերականը:
Դատավորները որոշել են, որ Սարկոզիի դեմ մեղադրանքները բավարար ապացույցներ չունեն՝ գործը Բորդո քաղաքի ուղղիչ դատարան փոխանցելու համար: Միևնույն ժամանակ այս գործով տասը մեղադրյալներ, այդ թվում՝ Ֆրանսիայի բյուջեի նախկին նախարար Էրիկ Վերտը, Բետանկուրի ընկերը՝ լուսանկարիչ, նկարիչ և գրող Ֆրանսուա Մարի Բանյեն, և նրա գանձապահ Պատդրի դե Մեստրը 2014թ. կկանգնեն դատարանի առաջ:
«Բետանկուրի գործի» հետաքննությունը սկսվել է 2007թ. միլիարդատեր կնոջ դստեր հայցից, որը Ֆրանսուա Մարի Բանյենին մեղադրել է իր մորից նվերներ և դրամական նվիրատվություն շորթելու մեջ: Գործն ազգային նշանակություն է ձեռք բերել, քանի որ Բետանկուրը ներգրավված է եղել քաղաքական խաղերի մեջ: Հետաքննությունը Սարկոզիին ներգրավել է գործի մեջ 2012թ. մայիսին՝ նախագահական ընտրություններում պարտություն տանելուց հետո: 2013թ. մայիսին նախկին նախագահի դեմ ներկայացվում է մեղադրանք, որի համաձայն՝ նա օգտվել է Բետանկուրի առողջական վիճակից, ով տառապել է Ալցհեյմերի հիվանդությամբ: Քննիչների կարծիքով՝ հնարավոր է Սարկոզին նրանից գումար է խնդրել 2007թ. նախընտրական քարոզարշավի համար: Նախկին նախագահը հերքում է բոլոր մեղադրանքները:
