Միգրացիան միայն բացասական երևույթ չէ. այս կարծիքին է Տարածաշրջանային հետազոտությունների կենտրոնի ղեկավար Ռիչարդ Կիրակոսյանը:
Ելույթ ունենալով «Արտագաղթի հոգեբանությունը. գաղթականի կյանքը իջեցված սոցիալական կարգավիճակի պայմաններում» գիտաժողովի ժամանակ` նա ասաց, որ մարդիկ, որոնք արտագաղթում են, շատ հաճախ ձեռք են բերում գիտելիքներ ու հմտություններ, որոնք չէին կարող ձեռք բերել Հայաստանում: Ուստի եթե կառավարությունը համապատասխան քաղաքականություն վարի` հետագայում այդ մարդկանց հմտությունները Հայաստանի համար այս կամ այն կերպ ծառայեցնելու համար, ապա միգրացիայի բացասական հետևանքը կարող է վերածվել դրականի: Այժմ, սակայն, ըստ Կիրակոսյանի, Հայաստանից արտագաղթը այնքան է մեծացել, որ անվտանգության խնդիրը շատ է սրվել: Բանակում ծառայողների թիվն է կրճատվում, չամուսնացած երիտասարդ աղջիկների թիվն է ավելանում և այլն: Ուստի, ըստ Կիրակոսյանի, սա պետք է մտահոգի իշխանություններին` ստիպելով նրանց առավել մեծ ուշադրություն դարձնել աղքատության վերացմանն ու սոցիալական խնդիրների լուծմանը:
