Քաղաքագետ Սուրեն Զոլյանը «Սասնա ծռեր» խմբի գործողությունները որակում է ապստամբություն. «Ծայրահեղ մեթոդ էր, բայց իրավիճակը դա էր թելադրում։ Միևնույն ժամանակ չեմ կարծում, որ այդ քայլով հնարավոր եղավ գլոբալ փոփոխությունների հասնել՝ վարչապետ փոխվելով համակարգային իրավիճակ Հայաստանում չփոխվեց»,- «Առաջին լրատվական»-ի հետ զրույցում ասաց Զոլյանը։
Քաղաքագետն ընդգծում է՝ եթե իրավիճակը գնահատենք այն տեսանկյունից՝ արդյոք իրենք հասան իրենց պահանջների բավարարմանը, ապա այդ տեսանկյունից գործողություններն արդյունավետ չէին. «Իրենք պահանջում էին Սերժ Սարգսյանի հրաժարականը և քաղբանտարկյալների ազատ արձակումը։ Բայց Սերժ Սարգսյանը հրաժարական չտվեց, ավելին՝ ծրագրեր է մշակում իր հետագա պաշտոնավարման համար 2018 թվականից հետո։ Ինչ վերաբերում է քաղբանտարկյալների ազատ արձակմանը, ապա նրանք ոչ միայն ազատ չեն արձակվել, այլ նրանց թիվն օրեցօր ավելանում է։ Իշխանությունների վերաբերմունքն էլ նրանց նկատմամբ շատ ավելի կոշտ է, քան կար»,- ասաց մեր զրուցակիցը։
Սուրեն Զոլյանը հիշեցնում է ապրիլին անցկացված ընտրությունները՝ ընդգծում, որ իշխանությունները նման արդյունքով որոշակիորեն լեգիտիմացրեցին դրանք. «Ապացուցեցին, որ այդ մեխանիզմները գործում են, ընտրությունները դարձել են բոլորովին կառավարելի մի մեխանիզմ, մի ծիսակատարություն։ Ընտրական համակարգի մեջ հազարավոր մարդիկ են ընդգրկված։ Ես հիշում եմ՝ 1995 թվականի ընտրություններից առաջ Սիլվա Կապուտիկյանի հետ էինք զրուցում, ասաց՝ ինձ համար այդքան կարևոր չէ, թե ով ընտրվեց, ով՝ ոչ։ Ինձ համար կարևոր է՝ քանի հազար մարդ «փչացավ» այս ընտրությունների ընթացքում․ մեկը կաշառք է բաժանել, մեկը կաշառք է վերցրել, մեկը ձայն է բերել, մեկը լցոնել։ Այդ քաղաքացիները փաստորեն դառնում են այս ֆեոդալական համակարգի մի մասը, ճորտերը։ Նման պայմաններում ընտրություններով որևէ բան փոխելու հավանականություն չկա»,- ասաց քաղաքագետը։
Դիտարկմանը, թե քաղաքացիները մեծամասամբ չընդունեցին նաև զենքով պայքարի մեթոդը, Սուրեն Զոլյանն արձագանքեց. «Նայեք՝ քանի ընտրական հանձնաժողով կա ու քանի մարդ է ներգրավված այդ պրոցեսներում։ Ճիշտ է, հատուկ ուսումնասիրություն չեմ արել, բայց այդ մարդկանց ինչպե՞ս փողոց դուրս բերես։ Մարդիկ գումար են բաժանում, ցուցակ են տանում-բերում, հեռախոսով կարգավորումներ անում, մարդիկ սպասում են 10 հազար դրամ տան՝ գնան ընտրություններին։ Սպասել, որ այդ զանգվածը կգա փողոց պայքարի՝ միամտություն է։
Մեր զրուցակիցն անդրադարձավ նաև «Սասնա ծռերի» գործով դատավարություններին. «Դատավարություն լինել չի կարող, Ժնևյան կոնվենցիայում ամրագրված է՝ ապստամբների վրա տարածվում է ռազմագերու կարգավիճակը։ Ուստի այդ դատավարությունը ի սկզբանե անիմաստ է, զարմանում եմ, որ այդքան ներգրավված իրավաբան այդ մասին չի բարձրաձայնում։ Նույնիսկ պաշտոնական մեղադրանքի մեջ չկա ահաբեկչություն հոդվածը։ Նրանք ոչ թե քաղբանտարկյալներ են, այլ ապստամբներ, ռամզագերիներ»։
