Գովազդային չափորոշիչների բրիտանական կոմիտեն (ASA) արգելել է էլեկտրոնային ծխախոտների մի քանի ապրանքանիշների գովազդը: Ինչպես նշում է The Independent թերթը, սա կոմիտեի առաջին քայլն է՝ ուղղված էլեկտրոնային ծխախոտների դեմ:
Արգելքը վերաբերում է E-Lite, Sky Cigs, Ten Motives և Five Colors էլեկտրոնային ծխախոտների գովազդներին և կապված է այն բանի հետ, որ գովազդային տեսահոլովակներից պարզ չէ, որ գովազդվող ապրանքն էլեկտրոնային ծխախոտ է: Հետաքննության պատճառ են հանդիսացել հեռուստադիտողների բողոքները:
ASA-ն ամենաշատ բողոքները ստացել է E-Lite էլեկտրոնային ծխախոտների գովազդի կապակցությամբ: Տեսանյութում պատկերված է ընտանիք, որը խաղում է մեկ տարեկան երեխայի հետ: Այն բանից հետո, երբ հայրը դուրս է գալիս ծխելու, երեխան կանգնում է և անում առաջին քայլերը, այնուհետև պարում է «Gangnam Style», որից հետո կրկին նստում է հատակին: Վերադառնալով սենյակ՝ հայրը հարցնում է. «Ի՞նչ եմ բաց թողել»: ASA-ի կայքում հաղորդվում է, որ տեսանյութում խախտվել է երեխայի ուշադրությունը ծխելու վրա գրավելու արգելքը: Բացի այդ, գովազդից անհասկանալի է՝ արդյոք E-Lite-ի էլեկտրոնային ծխախոտները նիկոտին պարունակո՞ւմ են, թե՞ ոչ:
