Միջազգային կառույցների կողմից բազմիցս շեշտվում է, որ քանի դեռ Հայաստանում և Ադրբեջանում ներքին խնդիրները հարթված չեն, կողմերը չեն կարողանա վճռական քայլերի գնալ ԼՂ հարցի կարգավորման հարցում: Այժմ ենթադրվում է, որ Հայաստանում սկսվելիք երկխոսությունը Սերժ Սարգսյանի համար բանակցային գործընթացում նման քայլերի գնալու հիմք է հանդիսանում:
Ռազմավարական մշակույթի ռուսական հիմնադրամի փոխնախագահ Անդրեյ Արեշևը «Առաջին լրատվականի» հետ զրույցում նկատեց, որ եթե կա կարծիք, թե իշխանության և հիմնական ընդդիմության` Հայ ազգային կոնգրեսի միջև համաձայնության հասնելուց հետ, Սերժ Սարգսյանը կկարողանա ԼՂ հարցում որոշակի զիջումների գնալ, ապա դրանք անիրական են. «Նման զիջումները պարզապես կպայթեցնեն Հայաստանի ներքաղաքական իրավիճակը, և բանակցային գործընթացը կավարտվի չսկսված, քանզի ընդդիմությունը, որը տարբեր նպատակներ է հետապնդում, անմիջապես կմեղադրի Սարգսյանին ազգային դավաճանության մեջ»:
Արեշևը նկատեց, որ Հայաստանում ընթացող երկխոսությունը ընդդիմության և իշխանության միջև դրական երևույթ է, և դրանում կարևոր համարեց այն, որ և՛ իշխանության, և՛ ընդդիմության ներկայացուցիչները ընդգծում են, որ այդ երկխոսությունը ոչ մի դեպքում չպիտի ընթանա ի հաշիվ Հայաստանի հետաքրքրությունների, որպես ԼՂՀ-ի անվտանգության երաշխավոր:
«Կարծում եմ, որ Հայաստանում հասարակական կարծիքի և ներքաղաքական ուժերի համախմբումը կնպաստի ԼՂ հարցի բանակցային գործընթացում երկրի դիրքորոշման ամրապնդմանը»,- մանրամասնեց ռուսաստանցի փորձագետը: