Փարիզից Ցյուրիխ թռչող ֆրանսիական ուղևորատար ինքնաթիռից գողացել են 1,6 մլն եվրո արժողությամբ 44 կգ ոսկե սալիկներ, հաղորդում է TF1-ը:
Ոսկին տեղափոխվել է Air France ընկերության ինքնաթիռի բեռների բաժանմունքում: Ընդհանուր առմամբ՝ ինքնաթիռ է բարձրացվել 300 կգ թանկարժեք մետաղ: Ոսկու կորուստը պարզվել է միայն Շվեյցարիայում բեռնաթափման ժամանակ:
Ինչպես նշում է Le Monde-ը, ոստիկանությունը գողության համար կասկածում է Շառլ դը Գոլի անվան օդանավակայանի աշխատակիցներին, որտեղ տեղի է ունեցել բեռները ինքնաթիռ տեղափոխելու գործընթացը:
Պարբերականը գրում է, որ ոսկին փարիզյան օդանավակայանով տեղափոխելու գործընթացը պարբերական բնույթ է կրում, այնպես որ բեռնակիրները կարող էին պլանավորել գողությունը:
Այն մասին, թե ում են պատկանել սալիկները, և ով պետք է դրանք ստանար Շվեյցարիայում, չի նշվում:
