Ճանապարհ փակելը մնացել է հուսահատ ժողովրդի ցասման, բողոքի միակ քիչ թե շատ արդյունավետ միջոցը: Իհարկե, ոչ այն իմաստով, որ բարձրացված խնդիրները լուծվում են: Բայց գոնե բարձրացված հարցերը քննարկվում են, որովհետև, երբ ճանապարհ է փակվում, պաշտոնյաները հարկադրված հանդիպում են բողոքավորներին: Միևնույն է` իշխանությունները դասեր չեն քաղում և շարունակում են հետևողականորեն անտեսել հասարակության կարծիքը, երբ նույնիսկ խնդիրը վերաբերում է այնպիսի հարցերի, որոնք կարող են օպերատիվ լուծում ստանալ նույնիսկ տեղական իշխանությունների մակարդակով: Համայնքների խոշորացման ծրագիրն, իհարկե, այդպիսիններից չէ, սակայն կենսական խնդիր է, որն ոչ միայն վերաբերում է օպտիմալ կառավարմանն, այլ նաև` տասնյակ հազարավոր մարդկանց կենցաղին, ապրելակերպին, աշխատանքին:
Այսօր մեկնարկած արտահերթ նիստում խորհրդարանը քննարկելու է նաև «Վարչատարածքային բաժանման մասին» օրենքում փոփոխություններ կատարելու նախագիծը, որով նախատեսվում է 118 համայնք միավորել 15-ի մեջ։ Իշխանություններն իրենց փաստարկները հիմնավորում են օպտիմալ կառավարման անցնելու, պետական միջոցները խնայելու անհրաժեշտությամբ: Սա այն դեպքն է, երբ իշխանության փաստարկները գուցե նաև ճիշտ են` չնայած ակնհայտ է, որ կառավարության դարդ ու ցավը փողեր խնայելն է ու մյուս գործոնները երկրորդական-երրորդական են: Բայց եթե նույնիսկ իշխանությունների փաստարկներն անխոցելի են, նման ցավոտ ռեֆորմները չի կարելի իրականացնել` առանց համայնքների կարծիքը հաշվի առնելու, նրանց առաջարկները քննարկելու:
Օրինակ՝ կառավարությունում ասում են, թե Վարդենիսի մի շարք գյուղերում խոշորացումն անհրաժեշտություն է, որովհետև առկա կադրային ռեսուրսով հնարավոր չէ ձևավորել անգամ ՏԻՄ մարմինները: Սա ճշմարտություն է ու, ցավոք, շարունակվող արտագաղթի ֆոնին` ոչ միայն Վարդենիսի, այլև Երևանին անհամեմատ մոտ տարածաշրջանների համար: Վարդենիսի տարաշրջանի մոտ 20 գյուղերի բնակիչները «մարսել» են խոշորացման անխուսափելիությունը, բայց ուզում են, որ կառավարությունը չտրվի մեխանիկական միավորումների գայթակղությանը և լսի նաև խոշորացման իրենց վարկածները: Ի վերջո, եթե իշխանության համար օպտիմալ կառավարումն է կարևոր, մարդիկ էլ ուզում են այնպիսի տարբերակներ գործեն, որպեսզի մեկ տեղեկանք ձեռք բերելու համար ստիպված չլինեն կիլոմետրեր կտրել կամ չեղած գումարները ծախսել տրանսպորտի վրա:
Վարդենիսի շրջանի մոտ 20 համայնքների բնակիչներ այսօր առավոտից փակել են Վարդենիս-Մարտակերտ ավտոճանապարհը՝ պահանջելով կասեցնել համայնքների խոշորացման այն ծրագիրը, որը ներկայացվել է իրենց, և հաշվի առնել գյուղացիների կարծիքը: Այս անգամ էլ է հաջողվել ճանապարհը բացել ոստիկանության օգնությամբ: Բայց երկրում սոցիալական դժգոհությունն ահագնանում է ու վաղը, մյուս օրը ոստիկանության ռեսուրսներն այլևս չեն բավարարելու: Մյուս կողմից` ոստիկանությունը միանգամայն այլ առաքելություն ունի և չի կարող անընդհատ զբաղվել իշխանությունների անորակ կառավարման հետևանքների չեզոքացմամբ: Իշխանությունները պարտավոր են դասեր քաղել և խնդիրները լուծել հանրային դիսկուրսի դաշտում, եթե, իհարկե, միտումնավոր չեն հասունացնում սոցիալական բունտ:
