Իրաքյան Մոսուլի մոտ կոալիցիայի հարվածից ավելի քան 100 մարդ զոհվել է, 36-ը մնում են անհետ կորածների ցուցակում, ասված է ԱՄՆ ղեկավարած կոալիցիայի հայտարարությունում: Այդ մասին հայտնում է RIA Novosti-ն:
Ընդ որում, կոալիցիայի տվյալներով, խաղաղ բնակիչները զոհվել են ԴԱԻՇ-ի դրած պայթուցիկի դետոնացիայից, այլ ոչ թե կոալիցիայի արկից:
«Իրաքի Մոսուլի Ալ Ջադիդա շրջանում կոալիցիայի մարտի 17-ի հարվածի հետաքննությունը պարզել է, որ երկրորդ պայթյունը ուղեկցվել է փլզումով, որի հետևանքով զոհվել են ԴԱԻՇ-ի 2 դիպուկահար, 101 խաղաղ բնակիչ շենքի առաջին հարկերում թաքնվածներից, և 4 խաղաղ բնակիչ հարևան շենքից: Անհետ կորել են 36 խաղաղ քաղաքացի, որոնք ենթադրաբար եղել են հարվածի ենթարկված շենքին միացած մյուս շենքում»,- ասված է հայտարարության մեջ:
«Հետաքննությունը պարզել է, որ ԴԱԻՇ-ը մեծ քանակությամբ պայթուցիկ է տեղադրել շենքում, որտեղ գտնվել են բազմաթիվ խաղաղ բնակիչներ, ապա այնտեղից հարձակվել է իրաքյան ուժերի վրա»,- ասված է հայտարարության մեջ:
Հայտնվում է, որ կոալիցիան և իրաքյան ուժերը չեն իմացել շենքում խաղաղ բնակիչների ներկայության մասին:
