Առևտրաշրջանառության ծավալով Հայաստանի թիվ մեկ գործընկեր-երկիրը Ռուսաստանն է: Դեպի այս երկիր արտահանումը, ըստ ՊԵԿ տվյալի, 2013թ.-ի առաջին կիսամյակում կազմել է 143 մլն 739 հազար դոլար, իսկ ներմուծումը` 510 միլիոն 616 հազար դոլար: Անցած տարվա նույն ժամանակի համեմատ և’ ներմուծումը, և’ արտահանումն աճել են: Ինչպես երևում է առևտրային հաշվեկշիռը բացասական է:
Երկրորդ տեղում աշխարհի թիվ 2 տնտեսությունն է` Չինաստանը: Նույն ժամանակում դեպի այս երկիր արտահանումն ավելացել է մոտ 4.5 անգամ, իսկ ներմուծումը կրճատվել է մոտ 12 տոկոսով: Չնայած դրան առևտրային հաշվեկիշռը դեռ բավական հեռու է դրական լինելուց (ներմուծումը`171 մլն 111 հազար դոլար, արտահանումը`27 մլն 574 հազար):
Երրորդ տեղում եվրոպական ամենակայուն տնտեսությունն է` Գերմանիան: Դեպի այս երկիր ներմուծումն անցած տարվա համեմատ կրճատվել է, արտահանումն` աճել: Այնպես որ, առևտրային հաշվեկշիռը մնացել է բացասական (ներմուծումը`127 մլն 830 հազար դոլար, արտահանումը`38 մլն 777 հազար դոլար):
Չորրորդ տեղում Իրանն է: Այս երկրի հետ արտաքին առևտրի կառուցվածքում մեկ տարում կրճատվել է և’ արտահանումը, և’ ներմուծումը: Արտահանման ծավալն ավելի քան 2 անգամ հետ է մնում ներմուծման ծավալից:
Եվ հնգյակը եզրափակում է Միացյալ Նահագները: Այս երկրի հետ արտաքին առևտրի հաշվեկշիռը բացասական է, բայց համեմատաբար ցուցանիշը փոքրանում է: Այնուհետև, առաջին տասնյակում են նաև Բելգիան, Ուկրաինան, Բուլղարիան, Թուրքիան և Իտալիան:
Առաջին տասնյակի երկրներից առևտրային հաշվեկշիռը դրական է միայն Բելգիայի (ներմուծումը`36 մլն 994 հազար դոլար, արտահանումը`81 մլն 75 հազար դոլար) և Բուլղարիայի (ներմուծումը`35 մլն 838 հազար դոլար, արտահանումը`67 մլն 948 հազար դոլար)հետ:
