Ամերիկացի վերլուծաբան, նախկին դիվանագետ Ռիչարդ Կոզլարիչը մտահոգիչ է համարում խաղաղ ցուցարարների նկատմամբ գործադրված բռնությունը Թուրքիայի նախագահի վաշինգտոնյան այցի ընթացքում: Կոզլարիչը նման մեկնաբանություն տվեց «Առաջին լրատվական»-ին՝ խոսելով մայիսի 16-ին Վաշինգտոնում կայացած Թրամփ-Էրդողան հանդիպման արդյունքների մասին:
Ադրբեջանում ԱՄՆ նախկին դեսպանը զարմացած է այն փաստից, որ Թուրքիայի նախագահը չի կարողացել Թրամփի հետ հանդիպմանը հասնել իր համար կարևոր երկու խնդիրների լուծմանը՝ Ֆեթուլլահ Գյուլենի արտահանձնմանը և Ռեզա Զարաբի դեմ դատական պրոցեսի դադարեցմանը:
«Փոխարենը ուշադրությունը կենտրոնացվել է ահաբեկչության դեմ գլոբալ պայքարի հարցում երկու երկրների համագործակցության վրա: Թուրքիայի և Միացյալ Նահանգների հիմնական խնդիրը շարունակում է մնալ քրդական հարցը, թե քրդական որ խմբավորումներին Միացյալ Նահանգները պիտի աջակցի Սիրիայում: Այնուամենայնիվ, ինձ ավելի շատ մտահոգեց Թուրքիայի նախագահի «թիկնապահների» գործադրած բռնությունը խաղաղ ցուցարարների նկատմամբ՝ Թուրքիայի դեսպանի նստավայրի մոտ: Նմանատիպ բռնություն գրանցվել էր նաև 2016-ին Բրուքինգս ինստիտուտի շենքի բակում, երբ Էրդողանը եկել էր Վաշինգտոն»,- նշեց Ռիչարդ Կոզլարիչը:
ԶԼՄ-ները տարածել էին տեսանյութ, թե ինչպես են Էրդողանի կողմնակիցները հարձակվում Էրդողանի դեմ խաղաղ ցույց իրականացնող մարդկանց վրա և դաժան ծեծի ենթարկում նրանցից մի քանիսին: Ամերիկայի Հայ դատի հանձնախումբը հաղորդել էր, որ մայիսի 16-ին ամերիկահայերը քրդական, հունական և ասորական կազմակերպությունների հետ միասին ցույց են կազմակերպել ԱՄՆ-ում Թուրքիայի դեսպանի նստավայրի մոտ՝ բողոքելով Թուրքիայի նախագահի այցելության, երկրի ներսում իրականացվող բռնաճնշումների և Թուրքիայի ագրեսիվ արտաքին քաղաքականության դեմ:
