Ռուբեն Թաթուլյանը հանդիսանում է ներդրողների ակումբի 30 անդամներից մեկը: Մանրամասն տեղեկություններ չունեմ նրա ձերբակալության հետ կապված, որքանով տեղյակ եմ, նա պարզաբանումներ է տվել դրա վերաբերյալ,- այս մասին այսօր լրագրողների հետ զրույցում ասաց ՀՀ տնտեսական զարգացման և ներդրումների փոխնախարար Հովհաննես Ազիզյանը: Նա նաև հավաստացրեց, որ անկախ գործարար Ռուբեն Թաթուլյանի (Ռոբսոնի) ձերբակալությունից՝ ՀՀ կառավարությունը կշարունակի նրա հետ համագործակցությունը:
«Երեկ Ռուբեն Թաթուլյանը ներկայացրել է բացատրություններ այդ հարցի վերաբերյալ: Քանի դեռ դատարանի որոշում չի եղել, կարծում եմ, պետք չէ այդ հարցին անդրադառնալ, երբ որ կլինի, կծանոթանանք խնդիրներին և կգնանք առաջ: Ամեն դեպք էլ պատահում է բոլորի հետ, հուսով եմ, որ այս դեպքն էլ իր լուծումը կստանա»,- նշեց Ազիզյանը:
Անդրադառնալով հարցին՝ ակումբը կասկածի տակ չի՞ դնում նրա կենսագրությունը, նրա վարքը, և նրան այդ ակումբից չե՞ն հանի, փոխնախարարը նշեց, որ ակումբի առումով չի կարող պատասխանել, բայց կառավարության տեսանկյունից այդտեղ դեռևս խնդիրներ չեն տեսնում: Նա նաև հավելեց, որ այդ հարցի շուրջ կառավարությունում քննարկում դեռևս չի եղել:
Հարցին, թե ուսումնասիրե՞լ են Հայաստանում ներդրումներ անելու պատրաստակամություն հայտնած մյուս 29 գործարարների կենսագրությունը, նրանք էլ կապեր ունե՞ն քրեական աշխարհի հետ, Ազիզյանը պատասխանեց, որ չեն ուսումնասիրել:
Լրագորղները հիշեցրին, որ ներկայացնելով ռուսաստանաբնակ 30 գործարարներին, ովքեր պատրաստակամություն էին հայտնել ներդրումներ անել Հայաստանում, վարչապետն ասել էր, թե նրանք նոր որակ ու նոր էլիտա կստեղծեն: Հարցին, թե էլիտան քրեական աշխա՞րհն է, փոխնախարարը պատասխանեց. «Ինձ թվում է, որ ինչ-որ մեկ ձերբալության դեպք չի կարող մարդու վրա նման ստվեր նետել: Պետք է սպասենք ու տեսնենք, խնդիրներ կան, թե ոչ: Էս փուլում, եթե մի ձերբակալություն է եղել, ես չեմ իմանում ինչ պայմաներում, չպետք է այդ հարցը բարձրացվի»:
Մանրամասները՝ տեսանյութում:
